Шәһәр һәм район мәктәпләре 29 мең укучыга ишекләрен ачты. 2431 бала быел беренче сыйныфка укырга килде.
Гыйлем дөньясына һәм иҗади казанышларга әйдәп, алар өчен беренче кыңгырау чыңлады. Җитәкчеләр, укытучылар, ата-аналар балаларны уку елы башлану белән котладылар һәм белем үзләштерүдә уңышлар теләделәр.
Яңа уку елына мәгариф учреждениеләре зур әзерлек белән килделәр. Берничә мәктәпкә капиталь ремонт ясалды, калганнары да төзекләндерелде. Хәзер алар заманча төс алды. Гомумән, соңгы елларда Әлмәтнең мәгариф системасы сизелерлек матур үзгәрешләр кичерә башлады дип тә әйтергә була.
Узган уку елын укучылар триумф белән тәмамладылар - 180 бала медаль иясе булды, 27 укучы имтиханнарда 100 балл җыйды. Барлык фәннәр буенча уртача баллның инде алты ел рәттән Россия буенча уртача күрсәткечтән югарырак булуы да әһәмияткә ия.
Район мәктәпләре укучылары бөтенроссия олимпиадасының төбәк һәм йомгаклау этаплары нәтиҗәләре буенча рейтингларда тотрыклы рәвештә югары урыннарны били. Олимпиада хәрәкәтендә Әлмәт районы республика буенча 8 нче урынга күтәрелде. 164 призлы урын яуланды - бу бик яхшы нәтиҗәләр.
Соңгы вакытта профориентациягә аерым игътибар бирелә башлавы да куандыра. Нефтьчеләрнең хәйрия фонды ярдәме белән 120 тугызынчы сыйныф укучысы эшче белгечлеге алу мөмкинлегенә ирешкән булып чыкты. Сентябрьдән мәктәпләрдә һәм көллиятләрдә ясалма фәһем агентлары булдыру түгәрәкләре ачылуы да киләчәк һөнәренә юллама булып тора.
- Яңа уку елы һәрвакыт яңа башлангычлар, якты өметләр һәм зур максатлар белән бәйле. Мәктәп — белем чишмәсе, анда һәр көн яңа ачышларга юл ярыла.
Укучыларга ныклы сәламәтлек, уңышлар, яхшы билгеләр, укытучыларга — сабырлык, иҗади көч һәм рәхмәтле укучылар, әти-әниләргә — балаларыгызның уңышлары белән горурлану хисе һәм сабырлык теләп калабыз.