Казанда узган XI Милли матбугат форумында район газеталарының киләчәге һәм яшь укучыга юл табу турында сүз барды
11 ноябрьдә Казанда XI Милли матбугат форумы узды. Аның программасына «Многоликая Россия» XVII Бөтенроссия журналистлар бәйгесендә җиңүчеләрне бүләкләү дә кертелгән иде. Ә һөнәри сөйләшүләрнең берсе редакцияләрне көн саен борчыган сорауга багышланды. Мәсәлән, яшьләр яңалыкны күбесенчә телефоннан укыганда, туган телдәге язманы аларга ничек җиткерергә?
Мәскәү урамындагы элеккеге үзәк универмаг бинасында урнашкан Осталык үзәгендә төбәк газеталары, телерадиокомпанияләр һәм мәгълүмат агентлыклары вәкилләре очрашты. Кат-нашучылар исемлегендә Мордовиянең «Эрзянь правда», Адыгеяның «Адыгэ макъ», Дагыстанның «Ватан» газеталары вәкилләре дә бар иде. «Россиянең милли матбугаты: күптөрлелектә бердәмлек» дип аталган төп утырыш программасына Татарстан Дәүләт Советы Рәисе урынбасары Марат Әхмәтов, ВГТРК генераль директоры урынбасары Рифат Сабитов һәм «Татмедиа» республика агентлыгы җитәкчесе Айдар Сәлимгәрәев чыгышлары кертелгән иде.
Район газеталарының киләчәгенә аерым сөй-ләшү багышланды. Аны «Менделеевские новости» газетасының баш мөхәррире Джулия Искәндәрова алып барды. Осталык дәресләрендә әңгәмә кору, видеорепортаж әзерләү, редакция эшендә ясалма фәһем куллану кебек темаларга урын бирелде.
Әңгәмәдәшең ачылып сөйләсен өчен, сорауны ничек бирергә? Икътисад турындагы хәбәрне катлаулы сүзләрсез ничек аңлатырга? Болар – зур редакция өчен дә, район газетасы өчен дә көндәлек эш сораулары.
- «Многоликая Россия» бәйгесенә быел илнең 54 төбәгеннән 1133 эш тәкъдим ителгән. Алар Россия халыкларының тормышы, мәдәнияты һәм гореф-гадәтләре турында сөйли. Иң күп гариза гаилә һәм рухи кыйммәтләрне яктырту номинациясенә кергән. Бәйгенең төп бүләге – 500 мең сум.
Мондый очрашуларның кадере шунда: үз укучыңа юл эзләгәндә, башка редакцияләрнең тәҗрибәсен ишетү үз эшеңә дә яңача карарга ярдәм итә. Туган телгә мәхәббәт исә көндәлек тормышта беленә бит. Кулыңа газета аласың, үз авылың, үз шәһәрең, үзең белгән кешеләр турында үз телеңдә укыйсың. Кайчак бер җөмләгә тукталасың да елмаеп куясың. «Безнең якта гына шулай әйтәләр бит», – дисең. Шул җөмләнең газетада да, телефон экранында да үз урыны булсын иде.