Әлмәттә табигый янгыннарны булдырмау өчен ташландык җирләрне ачыклыйлар

Әлмәттә табигый янгыннарны булдырмау өчен ташландык җирләрне ачыклыйлар

Әлмәттә район башлыгы Гүзәл Хәбетдинова җитәкчелегендә шәһәр һәм район активы белән киңәшмә узды. Төп темаларның берсе янгын куркынычы чорына әзерлек һәм табигый янгыннарны профилактикалау булды. Нотык белән Әлмәт районының янгын күзәтчелеге буенча баш дәүләт инспекторы Равил Хөсәенов чыгыш ясады. 2026 ел башыннан районда 76 янгын теркәлгән, зыян күрүчеләр һәм һәлак булучылар бар. Ул бигрәк тә билгеләп үткәнчә, хәзерге вакытта коры үлән һәм чүп-чар януы куркыныч тудыра: быел 12 шундый очрак теркәлгән.

Соңгы өч елда ландшафт янгыннары саны өч тапкырга кимесә дә, проблема кискен кала бирә. Янгын чыгуның төп сәбәпләре коры-сарыдан чистартылмаган территорияләр, дачаларда чүп-чар яндыру һәм учак ягу булып кала.

Гүзәл Хәбетдинова профильле хезмәтләргә ташландык җирләрне ачыклауны активлаштырырга кушты. 
"Коры үлән — табигый янгыннарның иң еш сәбәпләреннән берсе. Мондый территорияләрне ачыкларга һәм иң иртә этапларда янгын чыгуны булдырмаска кирәк", - дип ассызыклады район башлыгы.

Янгынга каршы көрәштә районга шулай ук кирәкле техника белән җиһазландырылган 6 ирекле янгын сүндерү командасы ярдәм итә. Искәртәбез, 25 апрельдән 11 майга кадәр Татарстанда янгынга каршы махсус режим гамәлдә. Бу чорда учак ягу, коры үлән яндыру һәм чүп-чар яндыру катгый тыела. Бу кагыйдәләрне үтәмәгән өчен катгый административ җаваплылык каралган, ә махсус режим шартларында штрафлар сизелерлек арта: гражданнар өчен — 10 меңнән 20 мең сумга кадәр; вазифаи затлар өчен-30 меңнән 60 мең сумга кадәр; эшмәкәрләр өчен-60 меңнән 80 мең сумга кадәр; юридик затлар өчен-400 меңнән 800 мең сумга кадәр.

Янгын зур матди зыян, сәламәтлеккә зыян яки кешеләрнең үлеменә китерсә, гаеплеләргә җинаять җаваплылыгы яный. Бүгенге көндә барлык хезмәтләрнең һәм район халкының төп бурычы-профилактиканы көчәйтү һәм торак секторында да, табигатьтә дә фаҗигаләргә юл куймау.