Быел Татарстанда урман массивларына чиктәш территорияләрдә 200 дән артык кабыну очрагы теркәлгән. Урман эчендә зур янгыннар булмаса да, белгечләр коры үлән һәм яфраклар аркасында янгын куркынычының 3 нче классы саклануын искәртә һәм октябрь урталарына кадәр мониторинг дәвам итәчәген белдерә.
«Урманнарны саклау» федераль проекты (ул «Экологик иминлек» милли проектына керә) кысаларында алып барылган эшләр нәтиҗәсендә, республикабызда урман фондлары белән чиктәш зоналарда 372 термик нокта ачыкланган һәм 224 янгын очрагы уңышлы рәвештә сүндерелгән.
- ТР Урман хуҗалыгы министрының беренче урынбасары Илгизәр Зарипов хәбәр иткәнчә, сөенечкә каршы, быел турыдан-туры урман эчендә янгыннар теркәлмәгән. Бүгенге көндә республика территориясендә янгын куркынычының 3 нче классы гамәлдә. Министр урынбасары сүзләренә караганда, янгын куркынычы сезоны октябрьнең урталарына кадәр ябылмаячак. Бу чорда космос һәм җир өсте мониторингы туктаусыз эшләячәк.
Көзге чорда да урманнарда ут чыгу ихтималы шактый югары. Моның төп сәбәпләре — җир өстендәге коры яфраклар һәм үләннәр, шулай ук бакчаларны тәртипкә китерүчеләрнең яки урманга җыючыларның саксызлыгы булырга мөмкин, дип хәбәр итә «Татар-информ».
Ведомство вәкилләре гражданнарны игътибарлы булырга чакыра. Әгәр дә сез урманда яисә аңа якын урыннарда төтен яки ут күрсәгез, шунда ук махсус хезмәтләргә хәбәр итегез. Шалтырату өчен телефоннар: 112, 8-800-100-94-00 яки 8 (843) 221-37-95.