Әлмәттә аутизм турында мәгълүмат тарату көне узды

Әлмәттә балалар өчен бәйрәм оештырылды. Шулай ук өлкәннәргә инклюзив белем бирү кирәклеге һәм башка балалар белән бергә уку мөмкинлеге турында сораулар бирү мөмкинлеге бирелде. Акция «Барлык балалар өчен йөрәгегезне ачыгыз» дип аталды. 

«Кешеләр үзенчәлекләре булган балага карата агрессив булырга тиеш түгел. Мондый очрашулар күбрәк булган саен, аутизмлы балаларның нинди  икәнен белүчеләр күбрәк булачак, алар шундый ук,  аралашырга, дуслашырга, шундый ук мәктәпләргә, бакчаларга йөрергә телиләр», – дип сөйли үзенчәлекле бала әнисе Рузалина Габдрахманова.

Бер ел элек инклюзив проектка тьюторлар җитмәгән. Район башлыгы ярдәме белән хәзер заманча инклюзив мәктәп тулы күләмдә эшли.

"Безнең проект быел тулысынча педагогик кадрлар белән тәэмин ителде. Балалар үсә, мәктәпкә йөри", - ди  инклюзив проект кураторы Оксана Голубева.

Инклюзив мәктәпкә Әлмәт районыннан гына түгел, ә башка районнардан да ата-аналардан бик күп гаризалар килә. Шул уңайдан киләсе елда мәктәптә тагын бер ресурс мәйданчыгы ачу планлаштырыла. Проект кураторлары «Татнефть» грантында да катнаша. Бу бәйрәмне уздыру да ярдәмчеләрсез калмады. Аниматорлар, аквагример, сәүдә үзәге һәм «Чикен» кафесы җитәкчелеге – алар барысы да балалар өчен бәйрәмне бушлай оештырырга булыштылар.

"Безнең инклюзив проектыбызга ярдәм иткән «Шешмаойл» компаниясенә рәхмәт әйтәсе килә, алар безгә финанс яктан ярдәм иттеләр. Шулай ук балаларыбыз өчен сабын куыклары тамашасын бушлай уздыручы аниматор Лилиягә дә рәхмәт белдерәсем килә", - диде инклюзив проект кураторы Оксана Голубева.

Чыганак