Әлмәттә һава-десант гаскәрләре көнен билгеләп үттеләр

Әлмәттә тантаналы митинг һәм Мәңгелек утка чәчәкләр салу булды. Ленин мәйданында төрле елларда «канатлы пехота»да хезмәт иткән гвардия десантчылары җыелды. Күпләр гаиләләре, балалары, оныклары белән килгән.

Җыелучыларны Әлмәт муниципаль районы башлыгы урынбасары Марат Гыйрфанов сәламләде һәм хезмәтләре өчен рәхмәт белдерде: «Һава-десант гаскәрләрендә хезмәт һәрвакыт мактаулы булды. Бу -аерым горурлык, аерым намус эше. Бүген гражданнар тормышында сез яшь буынга патриотик тәрбия бирүдә лаеклы үрнәк булып торасыз. Үз үрнәгегез белән алып барган хезмәтегез өчен чын күңелдән рәхмәт сүзләрен җиткерәм. Нык сәламәтлек, тынычлык һәм игелек телим".

Митингта катнашучыларны Әлмәт шәһәре һәм Әлмәт районы хәрби комиссары Ришат Сабиров һөнәри бәйрәмнәре белән котлады: «Һава-десант гаскәрләре оешкан вакыттан бирле – Кораллы Көчләрнең элитасы. Һава-десант гаскәрләренә һәм диңгез пехотасына катлаулы бурычлар йөкләнгән. Хәзер әзерләнә һәм шул гаскәрләрдә хезмәт итәргә тели торган егетләр бик күп. Шуңа күрә сез элита һәм үрнәк булып торасыз. Барыгызга да сәламәтлек, иминлек һәм тыныч күк йөзе телим". 

Өч тапкыр "Ура!" кычкырып, десантчылар бөтен Ленин мәйданын тутырды.

Митингта катнашучылар хәрби бурычларын үтәгәндә һәлак булганнарны искә алдылар һәм Мәңгелек утка чәчәкләр салдылар. Бәйрәм шәһәр буйлап автойөреш белән дәвам итте.

Фото: Әлмәт муниципаль районы башлыгының матбугат хезмәте