Әлмәт артистлары җәмәгать транспортына утырды [+ФОТОЛАР]

Бу юлы да сәхнәне - җәмәгать транспортына, театрга килгән тамашачыларны - гап-гади пассажирларга алыштырып, артистлар троллейбуска утырды. Шулай итеп алар каһарман-шагыйрь Муса Җәлил туган көнне үзләренчә билгеләп үттеләр. "Шагыйрь сүзе" проектының дәвамы каһарман шагыйрь иҗатына, бигрәк тә аның тоткында булуга да карамастан, юмористик рухта сугарылган әсәрләренә багышланган иде. Гадәттәгечә, Ленин мәйданы тукталышында беренче очраган җәмәгать транспортына утырып киткән сәхнә әһелләре пассажирларны шаккатырып, елатып һәм көлдереп Төзүчеләр проспекты-Бигәш урамы боҗрасына чаклы җиттеләр, яңадан каһарманның һәйкәленә туктап, "Ачык микрофон"нан да файдаланмый калмадылар.