Әлмәттә 52 яшьлек хатын-кызны балигъ булмаганнарга хәмер саткан өчен хөкем иттеләр

Әлмәттә «Балигъ булмаганнарга алкоголь продукциясен ваклап сату» маддәсе буенча 52 яшьлек хатын-кызны хөкем иттеләр. Бу хакта ТР прокуратурасы хәбәр итә.

Суд хөкем ителүченең шәһәрнең азык-төлек кибетләренең берсендә сатучы булып эшләвен ачыклаган. Ханым Әлмәттә яшәүче 17 яшьлек үсмергә хәмер саткан. Элегрәк хөкем ителүче шундый ук хокук бозу өчен административ җаваплылыкка тартылган булган инде.

"Хатын-кыз үз гаебен тулысынча таныды. Суд аны алты айга дәүләт табышына 5% тотып калу шарты белән төзәтү эшләренә хөкем иткән", – дип аңлаттылар прокуратурада.

Хөкем карары законлы көченә кермәгән.