Шәфкать туташы Әлфия Хәмидуллина: үз һөнәремне яратам һәм аның белән горурланам

Ул Әлмәт районара күп профильле хастаханәсе стационарының иң тәҗрибәле шәфкать туташларының берсе. 40 еллык стажы стационарның хирургия бүлегендә эшләүгә багышланган, шуларның 29 елын медсанчастьта, ә хәзер районара күп профильле хастаханәсе стационарында.

Эренле хирургия медицинаның иң мөһим бүлекләренең берсе булып тора. Авыр төзәлә торган яралары булган иң авыр хирургик пациентлар Әлфия Шакировнаның оста һәм кайгыртучан кулларына эләгәләр. Көн саен ул эренле хирургия бүлегендә 15-20 кеше яраларын бәйли.

Мәктәптән үк  Әлфия медик булачагын белә иде. Мәктәптә медицина фәннәрен кызыксынып өйрәнә. Бу һөнәр аны бик кызыксындырган. 1983 елда Түбән Кама медицина училищесын тәмамлаганнан соң, ул Азнакай районындагы Актүбә табиб амбулаториясе стационарының хирургия бүлегендә эшли башлый, анда 11 ел эшли. Бүлектә бер табиб һәм бер шәфкать туташы эшли. Аның шәфкать туташы булып формалашуы нәкъ шунда булган дип саный. Аеруча төнге җәрәхәтләр, бала табу һәм хирургия профилендәге пациентлар белән очрашырга туры килә аңа.

Медсанчастька Әлфия 1994 елның маенда эшкә килә. Шул вакыттан бирле стационарның хирургия бүлегендә эшли. Үзенең остазлары дип бүлек мөдире Александр Александрович Семеновны, өлкән шәфкать туташы Валентина Николаевна Хоруженконы, тәҗрибәле шәфкать туташы София Габидиновна Таһированы саный. Аны шулай ук Лилия Өлфәт кызы Лотфуллина да күп нәрсәгә өйрәтә, хәзер ул хастаханәнең баш шәфкать туташы.

Хирургия бүлегенең өлкән шәфкать туташы Людмила Шапкина:
- Әлфия Шакир кызы бездә универсаль шәфкать туташы. Ул барысын да эшли ала: системаны да куя, поста да, документлар белән дә эшли ала. Универсаль солдат, мин аны шулай атыйм. Ул һәрвакыт ярдәмгә киләчәк. Хәзер андыйларны табу кыен. Мондый дәрәҗәдәге белгечне тәрбияләү бик катлаулы һәм озын процесс.

- Коллективтагы хезмәттәшләребез белән җылы һәм тату эшлибез. Монда безнең икенче йортыбыз, - ди Әлфия Шакировна. - Эшебез кызыклы һәм күптөрле, һәр көн башкасына охшамаган. Мин үз эшемне, әлбәттә, бик яратам, барысын да яратып эшлим. Мин бәйләүдән канәгатьлек алам, бигрәк тә үз пациентларның яралары төзәлгәч, эшеңнең нәтиҗәсен күргәч. Мин үз тормышымны эшсез күз алдына да китерә алмыйм, бу инде минем канымда. Ял көннәрендә күңелсезләнә башлыйм, кызлар шалтыратып, киңәш сорыйлар. Үз һөнәремне яратам һәм аның белән горурланам, - диде ул.

Эштән буш вакытта Әлфия Шакир кызы бакчада вакыт уздырырга, кышын чаңгыда шуарга ярата. Өйдән эшкә кадәр араны ул теләсә нинди һава торышында җәяүләп үтә.

"Медицина хезмәткәре көнендә хезмәттәшләремне һөнәри бәйрәмнәре белән котлыйм һәм иң мөһиме – сәламәтлек, гаилә бәхете, хатын-кыз бәхете, сабырлык һәм һөнәри үсеш телим",- Әлфия Шакир кызы. 

Фото: Әлмәт районара күп профильле хастаханәсе