Түбән Мактама һәм Тихоновканы төзекләндерүгә 30 млн сумнан артык акча юнәлдерелгән

Быел Түбән Мактама һәм Тихоновка халкы үзара салым программасын актив рәвештә хуплады, шуның нәтиҗәсендә анда инфраструктураны яхшырту буенча проектлар гамәлгә ашырылды. Әлеге программа буенча җыелган акчалар, шулай ук республика грантлары һәм шәһәр ярдәме кайбер мөһим эшләрне башкарырга мөмкинлек бирде.

Беренче Май, Ленин һәм Достоевский урамнарын ремонтлауның гомуми бәясе 18,5 миллион сум. 7 миллион сумнан артык акча Түбән Мактама һәм Тихоновка юлларына чокырларны ремонтлауга һәм вак таш түшәүгә тотылган. 565 мең сумлык яктырткычлар сатып алынган.

Моннан тыш, зиратларны карап тоту һәм җәмәгать урыннарын төзекләндерү эшләре башкарылды, ә тиздән балалар мәйданчыкларын ремонтлау планлаштырыла.

Исегезгә төшерәбез, ТР рәисе Рөстәм Миңнеханов карары белән күп балалы гаиләләр яши торган микрорайоннарда юлларга вак таш-ком катнашмасы салу өчен 100 миллион сум күләмендә өстәмә акча бүлеп бирелде. Түбән Мактама шәһәр тибындагы бистәсендә, Урсала һәм Колшәрип авылларында эшләр башкарылган.

Фото: Әлмәт районы башлыгы матбугат хезмәте