Әлмәтлеләрне үзләренең яңа ишегаллары турында фикер алышырга чакыралар

Әлмәттә 2023 елда «Безнең ишегалды» президент программасы буенча төзекләндереләчәк ишегалларында  халык белән очрашу булачак. Бу хакта район башлыгының матбугат хезмәте хәбәр итә.

Әлмәтлеләр үз ишегалларын төзекләндерү буенча фикер алышуда катнаша алалар, шулай ук аларның төзекләндерү схемаларын һәм эш төрләрен карау мөмкинлеге дә булачак.

Очрашу 19 октябрьдә 18.00 сәгатьтә Чехов ур., 25, 27, 29 адресы буенча узачак.

«Безнең ишегалды» программасы Татарстан республикасы президенты инициативасы белән барлыкка килде. Татарстан бюджеты һәм дәүләт компанияләренең ярдәме белән күп катлы йортлар ишегалларында юллар ясала, яктыртыла,  балалар мәйданчыклары һәм башка җиһазлар төзекләндерелә.