Хокук сакчылары Әлмәт районында яшәүчедән йөзләгән патрон һәм корал тапкан

Россия Эчке эшләр министрлыгының Әлмәт районы буенча бүлегенең җинаятьчеләрне эзләү хезмәткәрләренә Яңа Суркино авылында яшәүчеләрнең берсе үзендә корал саклавы турында мәгълүмат килә. Торакны караган ир-атлар хокук сакчылары алынган мәгълүматларга раслау тапкан.

Татарстан буенча эчке эшләр министрлыгы матбугат хезмәте хәбәр иткәнчә, тикшерү вакытында 42 яшьлек авыл кешесендә конструктив яктан мылтык һәм пистолетка охшаш әйберләр табылган. Моннан тыш, йортта 757 патрон тапканнар. Ир-ат сүзләренчә, вак калибрлы мылтык, газ пистолеты һәм сугыш кирәк-яракларын ул сигез ел элек авыл янындагы урманда тапкан. Табылдыкны үземә калдырырга була.

«Экспертиза нәтиҗәләре буенча, мылтыкка охшаган әйбер утлы корал булып тора. Ул ату өчен яраклы. Патроннарның бер өлеше сәнәгать ысулы белән эшләнгән һәм ату коралыннан ату өчен билгеләнгән», – диелә тикшеренү турындагы белешмәдә.

МР-153 шома көпшәле мылтыгын ир-ат үз теләге белән хокук сакчыларына тапшырган. Әлмәт районында яшәүчегә карата «законсыз рәвештә корал, утлы коралның төп өлешләрен, сугыш кирәк-яракларын алу, тапшыру, сату, саклау, ташу, җибәрү яки йөртү» маддәсе буенча җинаять эше кузгатылган, ди  хокук саклаучылар.