Әлмәттә психик яктан сәламәт булмаган хатын-кыз мәктәп укучыларына һөҗүм иткән

Әлмәттә 8 Март урамында сәламәт булмаган хатын-кыз мәктәп укучыларына һөҗүм итә. Шаһитлар хәбәр иткәнчә, ул кызларга ташлана һәм: "Мин сине буам" дип кычкыра. Зыян күрүчеләр полициягә мөрәҗәгать иткән.

Яңалык социаль челтәрләрдә һәм телеграм-каналларда, шәһәр пабликларында таралды.

"Полиция хезмәткәрләре вакыйга урынына шунда ук чыктылар, шикләнелүченең шәхесен ачыкладылар. Ул Әлмәттә яшәүче 34 яшьлек хатын-кыз булып чыкты. Хатын-кызның хроник психик тайпылышлардан интегүе ачыкланды, ул үз гамәлләренең фактын һәм куркынычлыгын аңламый һәм алар белән идарә итә алмый", – дип аңлатма бирде РФ Эчке эшләр министрлыгының Әлмәт районы  буенча массакүләм мәгълүмат чаралары белән үзара хезмәттәшлек буенча өлкән инспекторы Резеда Мөхәммәтдинова.

"Ул махсус типтагы психиатрия стационарында мәҗбүри дәвалануга мохтаҗ. Хәзерге вакытта ул Әлмәт психоневрология диспансерына салынган", – диде РФ Эчке эшләр министрлыгының Әлмәт районы  буенча массакүләм мәгълүмат чаралары белән үзара хезмәттәшлек буенча өлкән инспекторы Резеда Мөхәммәтдинова.

Хәзерге вакытта хокук саклау органнары тикшерүгә кадәр тикшерү үткәрә.