Әлмәт районында май бәйрәмнәре алдыннан куркынычсызлык чараларын көчәйтәчәкләр

Башкарма комитетның зур залында террорчылыкка каршы комиссия утырышы булды. Утырышта май бәйрәмнәренә әзерлек һәм аларны үткәрү чорында террорчылык актларын кисәтү һәм иҗтимагый иминлекне көчәйтү мәсьәләләре каралды.

Утырыш эшендә хокук саклау органнары вәкилләре, авыл җирлекләре башлыклары, мәгариф учреждениеләре, иҗтимагый оешмалар җитәкчеләре катнашты. Утырышны район башлыгы вазифаларын башкаручы Роза Әфләтунова үткәрде.

Кереш сүзендә Роза Әфләтунова куркынычсызлыкны һәм террорчылыктан саклануны тәэмин итүнең аеруча мөһим булуын ассызыклады. Ул хезмәтләрне максималь уяулыкка һәм җаваплылыкка өндәде, кабул ителә торган чараларның оперативлыгына һәм нәтиҗәлелегенә район халкының һәм кунакларның тормышы,  сәламәтлеге турыдан-туры бәйле булуын билгеләп үтте.

Әлмәт районы мәдәният идарәсе җитәкчесе Лола Салихова Әлмәт муниципаль районы территориясендә Җиңү көненең 80 еллыгына багышланган планлаштырылган бәйрәм чаралары турында доклад белән чыгыш ясады.

Россия Эчке эшләр министрлыгының Әлмәт районы буенча бүлеге җитәкчесе урынбасары Ленар Рәхмәтуллин бәйрәм чараларына әзерлек һәм үткәрү чорында террорчылык куркынычларын кисәтүгә һәм җәмәгать иминлеген көчәйтүгә юнәлдерелгән өстәмә чаралар турында сөйләде.

РФ милли гвардиясенең  ТР буенча гаскәрләрен ведомстводан тыш саклау идарәсенең Әлмәт филиалы башлыгы Размик Кюрегян 2025 елның беренче кварталында кешеләр күпләп була торган урыннарның террорчылыктан саклануын тикшерү нәтиҗәләрен тәкъдим итте.

Рус Акташы авыл җирлеге башлыгы Сергей Белоногов җирлектә террорчылыкны һәм экстремизмны профилактикалау эшчәнлегенең торышы, шул исәптән дини оешмалар һәм авыл җирлегенә килүче затлар белән эшләү турында сөйләде.

Утырыш йомгаклары буенча май бәйрәмнәрендә иминлек һәм хокук тәртибен тәэмин итү максатларында барлык кызыксынган якларның гамәлләрен координацияләүне көчәйтүгә юнәлдерелгән карарлар кабул ителде.

Кешеләрнең күпләп була торган урыннарына аерым игътибар биреләчәк, янгын куркынычсызлыгы кагыйдәләрен үтәүне контрольдә тоту көчәйтеләчәк һәм урамнарны патрульләү оештырылачак.