Татарстан республикасында 2,2 млн тоннага якын бодайны тикшерәләр

2026 елда Россиядә өченче тапкыр йомшак һәм каты бодай бөртекләренә дәүләт мониторингы узачак. Төп оператор булып Россельхознадзор карамагындагы «Агросәнәгать комплексы продукциясенең иминлеген һәм сыйфатын бәяләү федераль үзәге» федераль дәүләт бюджет учреждениесе тора, ул яңа уңышның куллану үзенчәлекләрен бәяләячәк һәм ил буенча җыелма белешмәләр булдырачак.

Эшләр Россиянең көньягындагы, Идел буе һәм Себернең иң эре бөртекле субъектларын да кертеп, 26 төбәкне үз эченә алачак. Алар арасында-Татарстан республикасы да бар. Россия федерациясе авыл хуҗалыгы министрлыгы планы нигезендә, агымдагы елда 43,7 млн.тонна ашлыкны тикшерү планлаштырыла – бу көтелгән уңышның 55% тан артыгы.

Татарстанда  үзәк комитет филиалы белгечләре 2,2 млн тонна ашлыкка анализ ясыйлар. Моның өчен республиканың барлык 43 муниципаль районында 5 меңнән артык проба алыначак һәм 96 меңгә якын лаборатор тикшеренү үткәреләчәк.

Дәүләт мониторингында катнашу авыл хуҗалыгы җитештерүчеләре өчен мәҗбүри. Шул ук вакытта тикшеренүләр федераль бюджеттан финанслана һәм урып-җыю кампаниясе чорында түләүсез нигездә үткәрелә.

«Агросәнәгать комплексы продукциясенең иминлеген һәм сыйфатын бәяләү федераль үзәге» федераль дәүләт бюджет учреждениесе директоры Руслан Хәсәнов билгеләп үткәнчә, дәүләт мониторингы уңыш сыйфатына объектив бәя алырга мөмкинлек бирә һәм җитештерүчеләр өчен дә, дәүләт өчен дә мөһим.

«Ашлыкны дәүләт мониторингы авыл хуҗалыгы җитештерүчеләре өчен дә, шулай ук аграр базарны көйләүчеләр өчен дә мөһим, чөнки ул җыелган уңышның сыйфатына объектив бәя алырга мөмкинлек бирә», – дип ассызыклады ул.

Аның сүзләренә караганда, ашлык характеристикасы турындагы мәгълүматлар төрле класслы продукцияне катнаштырмаска һәм финанс югалтуларын булдырмаска ярдәм итә, шулай ук илнең азык-төлек иминлеге һәм базарны җайга салу өчен стратегик әһәмияткә ия.

Дәүләт мониторингы берничә этапта узачак – заявка бирүдән һәм пробалар алудан алып лаборатор тикшеренүләргә һәм нәтиҗәләрне системага кертүгә кадәр. Белгечләр дымлылык, аксым һәм клейковина микъдары, катышмалар булу, корткычлар белән зарарлану һәм башка күрсәткечләрне бәяләячәк.

Татарстанда мониторинг июньдә башлана һәм ноябрьдә урып-җыю кампаниясе тәмамланганчы дәвам итәчәк. Ул башланыр алдыннан аграрийларга мәгълүмат системаларындагы белешмәләрнең дөреслеген тикшерергә һәм оештырылган ашлык партияләре турында белешмәләрне үз вакытында кертергә тәкъдим ителде.