Татарстанда язгы кыр эшләре өчен кадрлар проблемасын хәл итү юлларын эзлиләр

Аграр секторда кадрлар кытлыгы мәсьәләсе турында Татарстан республикасы хөкүмәте йортында узган утырышта фикер алыштылар. Республиканың авыл хуҗалыгы һәм азык-төлек министры Марат Җәббаров чыгыш ясады.Аның сүзләренә караганда, төбәк хуҗалыкларында яңадан һөнәри әзерлек механизмнарын актив кулланалар. Уңышлы мисалларның берсе итеп Арча районын китерделәр — анда агрокөллият мәйданчыгында 15 механизатор укытканнар. Мондый яңадан укыту программалары шулай ук Актаныш, Кукмара, Саба һәм Чирмешән районнарында да эшли башлады.— Язгы кыр эшләре ике айдан да кимрәк вакыт эчендә башланачак. Бу вакытны техниканы тәртипкә китерү һәм, мөмкин булганча, аны яңарту өчен файдаланырга кирәк. Җиһазландыруга заманча якын килмичә җитештерүнең нәтиҗәлелеге турында сөйләргә туры килми, - дип белдерде Җәббаров.Министр чыгарылыш курс студентларын авыл хуҗалыгында вакытлыча эш белән тәэмин итүгә җәлеп итү кирәклегенә аерым тукталды. Ул билгеләп үткәнчә, кадрларны нормаль хезмәт шартлары булганда гына тотып калырга мөмкин.Элегрәк хәбәр ителгәнчә, Татарстанда агросәнәгать сыйныфларын тагын 35 мәктәптә ачарга планлаштыралар. Укучыларны төрле юнәлешләр буенча укыталар: генетика һәм селекция, нәтиҗәле терлекчелек, заманча биотехнологияләр, кошчылык, агроинженерия һәм чәчәк үрчетү. 2025 елда 20 мәктәптә агротехнология класслары ачылды.