Кондратьев, ТР Үзәк сайлау комиссиясе: бюллетеньнәр салынган урнаны буяу - җинаять

Татарстан Үзәк сайлау комиссиясе рәисе Андрей Кондратьев Президентны сайлауның беренче көнендә тавыш бирү урналарына буяу һәм зеленка агызган, шулай ук урналарны яндырган россиялеләрнең гамәлләрен каты тәнкыйтләде.

"Бу провокация генә түгел, бу хокук бозу гына түгел, бу җинаять эше", — дип ассызыклады Кондратьев.

Ул провокаторларга каты җәза бирүне яклый. Кичә Мәскәүдә хатын-кыз тавыш бирү өчен будканы яндырырга тырышты. Шулай ук  бюллетеньнәр өчен урналарга зеленка яки буяу түгү очраклары да була. Следком мондый вакыйга буенча эш кузгаткан инде.

"Кешеләр белә торып провокациягә, җинаятькә бардылар. Алар урналарны буяу белән тутырдылар, урналарны яндырдылар. Аларның барысы да тоткарланган. Аларның күбесе бу җинаять икәнен дә белми. Күрсәтмә буенча бардык диләр",- ди Кондратьев.

Журналистлар белән сөйләшкәндә ул сайлау участокларында полиция хезмәткәрләре эшләвен билгеләп үтте.

"Провокаторлар үз ватандашларыннан, туганнарыннан, дусларыннан тавышлар урларга теләгәннәр. Бу иң җирәнгеч. Барысын да кисәтәсем килә: провокацияләргә бирешмәгез", — дип нәтиҗә ясады ТР Үзәк сайлау комиссиясе рәисе.

Элегрәк Андрей Кондратьев илебезнең тотрыклылыгы, үсеше һәм иминлеге өчен тавыш биргәнен хәбәр иткән иде.

15 мартта Татарстанда 65 территориаль һәм 2 722 участок сайлау комиссиясе эшли башлады, шулай ук 45 вакытлыча сайлау участогы ачылды. Татарстанда яшәүче 3 миллионга якын кеше  сайлау хокукына ия. Сайлауларны үткәрүне сайлау комиссияләренең 22 мең әгъзасы тәэмин итә. Сайлау участокларында 16 меңнән артык күзәтүче эшли, шул исәптән чит ил күзәтүчеләре дә.