Әлмәттә шәһәрнең төп символын яңарттылар

Әлмәттә шәһәрнең төп символларыннан берсе – 3 миллиард тонна нефть чыгаруга багышланган монументны яңарттылар.

Хәзер монумент тирәсендәге баскыч кичләрен үзенчәлекле атмосфера тудыручы заманча яктырткыч белән бизәлгән. Моннан тыш, плитә өслеге тулысынча реставрацияләнде.

Бу эшләр – Татарстанның нефть сәнәгатенә багышланган һәйкәлләрне яңарту буенча масштаблы программаның бер өлеше. Аны нефтьчеләребез компаниясе үзенең 75 еллыгы уңаеннан гамәлгә ашыра. Әлмәттәге монументтан тыш, шәһәрдә тагын 6 һәйкәл, шулай ук бөтен Татарстан буенча берничә дистә объект яңартылган.

Белешмә. Әлмәт хаклы рәвештә нефть башкаласы булып санала, чөнки нәкъ менә монда Татарстанда иң эре нефть ятмасы табылган. Әмма, моңа карамастан, шактый озак вакыт төбәктә нефть тематикасына бер генә һәйкәл дә юк иде.

2007 елның августында шәһәребездә өч миллиард тонна нефть чыгаруны бәйрәм иттеләр. Әлеге вакыйга уңаеннан нефть фонтанын символлаштырган һәйкәл ачылды. Проект Россия Рәссамнар берлеге Сәнгать фондының Уфа филиалы тарафыннан эшләнгән. Һәйкәлнең авторлары – Октябрьск шәһәреннән скульптор Д.В. Йосыпов һәм Әлмәт рәссамы Р.Р. Курамшин. Авторлар уйлавынча, монумент Татарстан кара алтынын чыгаруның якты елъязмасында яңа этап һәм Әлмәтнең яңа символы булырга сәләтле. 27 метр биеклектәге унике көмеш агым бу тарихи казанышның бөтен нефть тармагы һәм тулаем Татарстан өчен мөһимлеген күрсәтә. Өч куәтле нефть агымы нефть чыгаруның әһәмиятле этапларын символлаштыра: беренче миллиард – 1971 елда, икенчесе – 1981 елда һәм өченчесе – 2007 елда.

Рәфкать Шаһиев