Әлмәттә мөмкинлекләре чикләнгән кешеләр көнен билгеләп үттеләр

Креатив процесслар фабрикасында халыкара инвалидлар көненә багышланган тантаналы чара узды. Биредә мөмкинлекләре чикләнгән, авырлыкларны җиңеп, уңышларга ирешкән кешеләрне хөрмәтләделәр. Әлмәт районында 10 меңнән артык шундый кеше яши, алар арасында 1189ы балачактан инвалид, шуларның 823е 18 яшькә кадәрге балалар. Чараның мәртәбәле кунаклары район башкарма комитеты җитәкчесе вазифаларын башкаручы Гүзәл Хәбетдинова һәм республиканың җир һәм милек мөнәсәбәтләре министры Азат Кадыйров булды.

Азат Кадыйров ТР рәисе Рөстәм Миңнеханов исеменнән сәламләде һәм инвалидларга актив тормыш позицияләре, иҗат һәм казанышлары өчен рәхмәт белдерде. Ул шулай ук аларның гаиләләренә һәм аларга ярдәм күрсәтүчеләргә рәхмәт белдерде. Министр Россия сәясәтенең социаль юнәлешле булуын һәм 11 миллионнан артык кешене тәшкил иткән инвалидларга ярдәм итү өстенлеген ассызыклады. Гүзәл Хәбетдинова, авырлыкларга карамастан, сизелерлек нәтиҗәләргә ирешкән кешеләргә тирән ихтирам белдерде. «Сезнең тырышлыгыгыз, иҗади уңышларыгыз, игелегегез һәм мәхәббәтегез барыбызны да рухландыра», – дип ассызыклады ул. Җитәкче аларга ярдәм итүчеләрнең барысына да: туганнарына, якыннарына, педагогларга һәм социаль хезмәт хезмәткәрләренә рәхмәт белдерде.

Җәмәгать оешмаларының актив әгъзаларына Әлмәт муниципаль районы советы һәм башкарма комитетының Рәхмәт хатлары тапшырылды. Аерым игътибар мөмкинлекләре чикле кешеләр тормышында спорт роленә бирелде. Котлау сүзләрен спорт идарәсе җитәкчесе Флорис Гарипов һәм Әзербәйҗан диаспорасы җитәкчесе Фикрат Бакиров җиткерде. Аеруча актив спортчыларны физик культура һәм спорт мдарәсенең Рәхмәт хатлары белән бүләкләделәр.

Тантаналы өлештән соң «Шанс» бию мәктәбе, «Ялкын» вокаль ансамбле, Рамил Галимҗанов һәм башка иҗат коллективлары катнашында бәйрәм концерты булды.

Фото: Әлмәт районы башлыгы матбугат хезмәте