Быел «Безнең ишегалды» республика программасы кысаларында 833 ишегалды территориясен төзекләндерү планлаштырыла

Тавыш бирүгә 274 иҗтимагый киңлек һәм 1550 ишегалды территориясе тәкъдим ителә.

«Алдагы елда төзекләндереләчәк иҗтимагый киңлекләр һәм ишегалды территорияләре өчен Татарстан халкы ТР дәүләт хезмәтләре порталында 2024 елның 30 апреленә кадәр тавыш бирә ала. Әлеге программа белән барлыгы 9 ел эчендә (2015 елдан 2023 елга кадәр) 398 иҗтимагый киңлек төзекләндерелгән, шуларның 225 объектында эшләр «Уңайлы шәһәр мохитен формалаштыру» федераль проекты кысаларында оештырылган, федераль һәм республика бюджетларыннан 23,9 млрд сум кулланылган», — дип хәбәр итте Татарстанның төзелеш, архитектура һәм торак-коммуналь хуҗалыгы министрының беренче урынбасары Алексей Фролов.

Бөтенроссия тавыш бирү 15 мартта башланган. Аның нәтиҗәләре буенча киләсе ел программасына кертеләчәк иҗтимагый киңлекләр исемлеге формалаштырылачак. Шулай ук 200 йорт территориясе исемлеге төзеләчәк. Тавыш бирүдә катнашырга 14 яшьтән өлкәнрәк республика халкы хокуклы. 

«Соңгы өч елда Татарстанда җәмәгать урыннарын сайлау буенча Бөтенроссия тавыш бирүдә катнашучылар саны ике тапкырга артты — 2021 елда 170 мең булса, узган ел бу сан — 363 меңгә кадәр җитте», — дип белдерде Татарстан шәһәрләре үсеше институты директоры Наилә Зиннәтуллина.

Тавыш бирүгә тәкъдим ителгән иң күп объектлар (24 территория) Казанда урнашкан. Яр Чаллыда 2025 елда төзекләндерүгә - 6, Түбән Кама һәм Әлмәт районнарында — җидешәр объект чыгарылган.

«Безнең ишегалды» республика программасы буенча Әлмәттә 2024 елда 36 йорт төзекләндереләчәк.

"Исегезгә төшерәбез, бу масштаблы программа 2020 елдан бирле гамәлдә һәм ТР Рәисе Рөстәм Миңнеханов инициативасы буенча гамәлгә ашырыла", — диде Тимур Нагуманов.

Программа гамәлдә булган өч ел эчендә Әлмәт районында барлыгы 264 йорт төзекләндерелгән.

"Берничә ел рәттән ишегалларын төзекләндерәбез һәм аларны яшәү өчен уңайлы итәбез, юл япмасын үзгәртәбез, балалар мәйданчыклары, спорт комплекслары урнаштырабыз. Бик күп ишегалларында эш башкарылган инде", - дип билгеләп үтте ул.

Узган ел «Безнең ишегалды» республика программасы буенча Әлмәт районында 41 территория төзекләндерелде, ә 2022 елда 77 территория төзекләндерелде.

"Эш дәвам итә, планнарга бераз үзгәрешләр кертелә. Быел 36 йорт буенча эшләр бара. Бу йортларда яшәүче халык  белән очрашулар узды. Төзелеш сезоны башлангач, подрядчы материаллар әзерләү белән шөгыльләнәчәк", — дип аңлатты Нагуманов.

Программа гамәлдә булган вакытта Әлмәт муниципаль районында барлыгы 532 ишегалды төзекләндереләчәк.