Халыкара жюри Әлмәт студент-поварларының осталыгын бәяләде

Әлмәт сәүдә-икътисад техникумы командасы «Россия – ислам дөньясы: KazanForum 2023» XIV халыкара икътисадый форумына багышланган KazanForum 2023 кысаларында студентлар арасында кулинар ярышларда көмеш призер булды.

Казанда 2023 елның 18-21 маенда «Россия – Ислам дөньясы: KazanForum»XIV халыкара икътисади форумы узды. KazanForum мәйданчыкларының берсендә Татарстан Республикасының 25 уку йорты студентлары арасында команда кулинар ярышлары узды.

Һәр уку йорты өч катнашучыдан торган команда тәкъдим итте. Әлмәт сәүдә-икътисад техникумы командасы республика һөнәри осталык конкурсларында күп тапкыр җиңүче студентлардан торды.

Республика уку йортлары студентлары арасында команда кулинар ярышлары ике этапта уздырыла. Ярышларның үзенчәлеге хәләл принциплар белән ризыклар әзерләүдә тора, аларда тыелган продуктлар булырга тиеш түгел.

Беренче читтән торып (сайлап алу) турдан соң 14 уку йорты, шул исәптән Әлмәт шәһәрен тәкъдим итүче Әлмәт сәүдә – икътисад техникумы җиңүчеләре билгеләнде.

Икенче тур  18 майда «Казан Экспо»  мәйданчыгында узды һәм конкурс ризыклары әзерләүдән гыйбарәт иде. Бу кайнар Вегетариан ашамлык (о-лакто вегетариан), гарнир һәм соус белән кайнар сыер ите, ресторан десерты.

Халыкара жюри әгъзалары составына  Онер Чуфаз (Төркия), Ернис Сапидинов (Кыргызстан), Мәрьям Шнуна (Мальдив), Амеур Альтиф (Тунис) һәм дөньяның башка атаклы шеф-поваралары кергән.

Жюри конкурсантларның ризыкларын билгеле бер критерийлар буенча бәяләде һәм мактаулы кунаклар һәм халыкара делегацияләр катнашында бүләкләү тантанасында җиңүчеләрне игълан итте.

Команда ярышлары нәтиҗәләре буенча Әлмәт сәүдә-икътисад техникумы студентлары ярышларның ике турын да узган уку йортлары арасында көмеш медальләр яуладылар.

"Татнефть" һәм  "Татнефть-УРС" конкурс уздырылганчы студентларга производство практикасы өчен урыннар бирделәр. Бу, һичшиксез, кулинария ярышларында катнашучыларның сыйфатлы практик әзерлегенә тәэсир итте, ди студентларның остазлары.

Техникум командасында катнашучыларның берсе, чыгарылыш курсы студенты Арутюн Егиазарян укудан буш вакытта инде «Сыроварня» ресторанында эшли һәм практик тәҗрибәсен камилләштерә. Команданың башка катнашучысы Виолетта Раскопина "Технолог. Алтын куллар - 2023" республика һөнәри конкурсында җиңгән.  Команданың тагын бер катнашучысы Руслан Мөхәммәтҗанов 2023 елның апрелендә «Пешекче эше» компетенциясе буенча бик яхшы демонстрацион имтихан тапшырган.

KazanForum кысаларында студентларны халыкара ярышларга әзерләү белән югары категорияле укытучы Эльвира Юнысова җитәкчелегендәге технология фәннәре укытучылары шөгыльләнә.

Эльвира Фәрит кызы WorldSkills стандартлары буенча чемпионатлар уздыру хокукына ия, «Пешекче эше» компетенциясе буенча демонстрацион имтиханнарның гамәлдәге эксперты, ул WorldSkills, Абилимпикс, Юныс Әхмәтҗанов исемендәге Халыкара конкурс призерларын һәм башкаларны әзерләгән.

Фото: Л. Хәбирова