Әлмәттә “Чыңлы тамчы” бәйгесенең финалы узды

Сайлап алу этапларына тырышып әзерләнүләр инде артта калды. Алда аларны зур сәхнә көтә. Алар өчен  җан атырга  аларның әти-әниләре, әби-бабайлары һәм, әлбәттә, остазлары килгән.

Вокал-театр студиясе укытучысы Ольга Долгая үзенең шәкерте Ева Баламутина белән ел дәвамында шөгыльләнгән.

Үзенең сәләтен күрсәтергә дип бәйгегә Карина Әхмәдиева да килгән. Музыка белән ул инде биш ел шөгыльләнә икән.

- Бала, әлбәттә, йолдыз булу турында хыяллана. Әлегә андый зур планнар кормасак та, музыка белән шөгыльләнүне дәвам итәбез. Кызыма  дәресләр бик ошый, - ди Каринаның әнисе Резеда Әхмәдиева.

Иң истә калган чыгышларның берсе – итальян телендәге “Блу Канари” җыры булды. Җырның исеме татар теленә тәрҗемә иткәндә “Зәңгәр кенәри” дигәнне аңлата.

- Безнең конкурс барлык балаларны да үз сәләтләрен үстерергә чакыра. Киләчәктә алар лаеклы җырчылар яки эстрада йолдызлары булмасалар да, биредә алган тәҗрибә аларга тормышта ярдәм итәчәк, – дип уртаклашты балалар һәм яшьләр иҗаты үзәгенең бүлек мөдире Диләрә Җиһаншина.

Фото:https://pixabay.com