Әлмәттә «Аваздаш»төбәк театр фестивале узачак

Әлмәттә «Аваздаш» төбәк театр фестивале узачак.

Фестиваль «Әлиф» иҗат берләшмәсендә катнашучы Татарстан хореографлары, режиссерлары һәм композиторлары иҗат иткән спектакльләрне, перформансларны һәм мастер-классларны берләштерәчәк.

Лабораториянең алты кураторы фестивальдә  яңа куелыш тәкъдим итәчәк:

хореограф, перформер һәм биюче Нурбәкә Батулла пластик спектакль тудырачак;
шагыйрә һәм тәрҗемәче Йолдыз Миңнуллина шигъри спектакль күрсәтәчәк;
композитор Эльмир Низамов Кәрим Тинчурин исемендәге театрның баш режиссеры Туфан Имаметдинов белән берлектә хор операсы булдырачак;
хореографлар, биючеләр һәм перфомерлар дуэты – Мария һәм Марсель Нуриевлар-пластик спектакль күрсәтәчәк.

«Аваздаш» фестивале төбәкнең мәдәни тәңгәллеген чагылдыра торган мифологик һәм символик темаларны тикшерүгә юнәлтелгән.

Төп күрсәтүләрдән тыш, фестивальдә актерлык осталыгы һәм заманча бию буенча мастер-класслар, спикерлар лекцияләрен, шулай ук заманча рәссамнар күргәзмәләрен үз эченә алган параллель программа булачак. Бу вакыйга, сәнгатьнең төрле формаларын бердәм мәдәни киңлектә берләштереп, традиция һәм хәзерге заман арасындагы диалог өчен мәйданчык булачак.

Әлмәтлеләр фестивальнең параллель программасының хэдлайнерын сайлауда катнаша алачак – төбәк яки Федераль спикерны һәм  ишетергә кызыклы булган теманы тәкъдим итә алачак. 

«Аваздаш» фестивале төбәкнең мәдәни экосистемасын үстерүгә һәм локаль сәнгать инициативаларына ярдәм итүгә юнәлдерелгән киңрәк «Аркадаш» проектының бер өлеше булып тора. Проект ике театр лабораториясен үз эченә ала:

«Караш» – яшь режиссерларның театр лабораториясе: алар үз эшләренең нәтиҗәләрен 28-30 мартта Әлмәттә узган шул ук исемдәге фестивальдә тәкъдим иттеләр;
«Аваздаш» – тәҗрибәле профессионаллар эшли торган театр лабораториясе һәм аның нәтиҗәсе ноябрь фестивале булачак.

Фото: Әлмәт районы башлыгы матбугат хезмәте