Янгын куркынычы арта

Янгын күзәтчелеге хәбәр иткәнчә, агымдагы елның беренче кварталында районда 39 янгын чыккан. Үткән елны бу чорда инде 59 очрак теркәлгән булган, быел кимрәк.

Халык гадәттәгечә ишегалларын, бакча-дачаларын, каралты-кураларын тәртипкә китерә башлый. Җыелган чүп-чарны чыгарып түксәләр ярый, ләкин күпчелеге «соңыннан түгәрбез әле» дип шунда өеп калдыра. Өелеп яткан коры үлән кояш астында кибә, шундук пыскып яна да башлый. Шул сәбәпле узган елны язгы-җәйге чорда 86 янгын чыккан булган. Быел яз иртә килү сәбәпле, март аенда коры үлән янып китү очраклары инде күзәтелгән. Урсалы тавында, Зәй-Чишмә авылында булган андый хәлләр.

17 апрельдән алып 10 майга кадәр Әлмәт җирлегендә учаклар ягу, чүп-чар, үләннәр яндыру катгый тыела. Бу турыда һәркем белеп торырга тиеш. Таләпләр үтәлмәгәндә саллы гына штрафлар түләргә туры киләчәк.

Янгын куркынычсызлыгы таләпләрен бозган өчен:          

  - гражданнарга - 10 мең сумнан алып 20 мең сумга кадәр, 

  - урындагы затларга - 30 мең сумнан 60 мең сумга кадәр,                                                                                      

- шәхси эшмәкәрләргә - 60 мең сумнан 80 мең сумга кадәр,     

- юридик затларга - 400 мең сумнан 800 мең сумга кадәр штраф салу каралган.

Бүгенге катлаулы тормышны законсыз гамәлләр кулланып тагын да катлауландырмыйк, та-ләпләрне төгәл үтик. Шулай булганда намусыбыз да чиста, күңелебез дә тыныч булыр.

Резеда Исмәгыйлева