Әлмәтнең спорт көллияте 55 яшьлек юбилеен билгеләп узды

Әлмәттә Татарстан республикасы спорт министрының беренче урынбасары Хәлил Шәйхетдинов булды. Эш визиты барышында ул яңартылган Әлмәт физик культура көллиятендә булды, ул 55 яшьлек юбилеен билгеләп үтә. Тантаналы чарада шулай ук Әлмәт муниципаль районы башкарма комитеты җитәкчесе урынбасары Светлана Лаптева һәм «Татнефть» генераль директоры урынбасары Рөстәм Мөхәммәдиев катнашты.

 55 ел эшләү дәверендә көллият физик культура һәм спорт буенча 6500дән артык белгеч әзерләп чыгарган. Аларның күбесе сәнәгать оешмаларында спорт буенча инструкторлар, мәгариф учреждениеләрендә физик культура укытучылары, балалар-яшүсмерләр спорт мәктәпләре һәм спорт клублары тренер-укытучылары булып эшли.

Бүген Әлмәт физик культура көллияте Татарстан республикасының көньяк-көнчыгышында «физик культура» белгечлеге буенча кадрлар әзерләүне гамәлгә ашыручы бердәнбер уку йорты булып тора.

Моннан тыш көллияттә волейбол, баскетбол, футбол, җиңел атлетика, спорт гимнастикасы, чаңгы спорты, милли көрәш буенча тренерларны әзерләү бара. Татарстан республикасы Хоккей федерациясе инициативасы белән 2006 елда «алкалы хоккей» белгечлеге буенча кадрлар әзерләү башланды. 2009 елдан көллияттә «йөзү», 2013 елдан – «бокс» белгечлеге ачылды.

2019 елда Татарстан Республикасы Министрлар Кабинеты Карары нигезендә Татарстан Республикасында спорт корылмаларын капиталь ремонтлау программасы буенча уку корпусына һәм тулай торак биналарына капиталь ремонт башланды. Хәлил Шәйхетдинов яңартылган көллият  белән танышты. Гимнастика залын, универсаль спорт залын, көрәш залын, информатика, тормыш иминлеге нигезләре кабинетларын, ашханәне һәм көллиятнең башка бүлмәләрен карап чыкты.

Спорт колледжының түгәрәк датасы уңаеннан студентлар тарафыннан концерт программасы әзерләнгән иде. Хәлил Шәйхетдинов сәламләү сүзе белән чыгыш ясады һәм Әлмәт физик культура көллиятен 55 яшьлек юбилее белән котлады.

  Хәлил Шәйхетдинов: "Сезнең монда фундаменталь белем алуыгызны телисе генә кала. Теорияне һәм практиканы берләштереп, физкультура һәм спорт өлкәсендә эшне дәвам итерлек лаеклы вәкилләр булыгыз!".

Көллият хезмәткәрләрен Мактау грамотасы белән бүләкләделәр.