Әлмәттә реклама листовкалары таратучыларны тәнкыйтьләделәр

Ябыштырылган һәм Әлмәт буйлап таратылган реклама листовкалары турында район башлыгы Тимур Нагуманов  сөйләде. Ул  атналык планерка вакытында экология һәм төзекләндерү департаменты директоры Марат Юлдашевка тәртип бозучыларга карата катгый чаралар күрергә кушты.

Шәһәр башлыгы белдерүләрдә күрсәтелгән номерларны штрафларга һәм блокировкага куярга кирәклеген билгеләп үтте, шул ук вакытта төзекләндерү кагыйдәләренең үтәлешен активрак контрольдә тотуны таләп итте.

- Реклама максатларында шәһәр буйлап чүп-чар сибү кебек ысул булырга тиеш түгел. Бу чүпне аннары кем җыярга тиеш? Бу бит коточкыч, халыкны мыскыл итү, - диде Нагуманов.

Фото: Әлмәт районы башлыгы матбугат хезмәте