Әлмәттә Ришат Әбүбәкеровны искә алдылар

Әлмәт шәһәренең Мактаулы гражданинының туган көнне аның каберенә чәчәкләр салырга район башлыгы Тимур Нагуманов, хезмәттәшләре, дуслары, туганнары, балалары килгән иде.

Ришат Әбүбәкеров вафатына өч ел үтте.  Әмма аның истәлеге мәңгегә саклана.  Күп кенә әлмәтлеләр аны нефть төбәгенең советлардан соңгы тарихында иң яхшы башлык дип атыйлар. Ришат Фазлетдин улын акыллы һәм үтемле түрә буларак искә алалар. Ул Әлмәт районын 11 ел җитәкләгән һәм нәкъ менә аның чорында шәһәр дә боҗра чишелешләре, шәһәр паркы, ремонтланган урамнар, социаль әһәмияттәге объектлар һәм торак йортлар, иҗтимагый киңлекләр, һәм, әлбәттә, Әлмәтнең визит карточкасы — шарлавыклы буалар барлыкка килгән.  Ул һәрвакыт бик яхшы эшләгән, лидер булган, аның артыннан кешеләр бик теләп ияргән. Шәһәр белән идарә итүгә ул һәрвакыт комплекслы якын килә.

«Бу көнне билгеләп үтмичә булмый. Ришат Фазлетдин улы без хәзер файдаланган нигезгә нигез салды. Аның иң зур өлеше – командада эшләү алымнарын формалаштыру. Бүгенге көнгә кадәр башкарма комитет һәм шәһәр хезмәтләре – Ришат Фазлетдин улы формалаштырган һәм эшләргә өйрәткән команда. Бүген без файдаланган нәрсәләр-аның казанышы. Туган илебезне үстерүдә һәркемгә дә шундый эз калдыру насыйп булмый. Ул бәхетле кеше дип уйлыйм. Без аның турында бары тик яхшы сүзләр белән генә искә алабыз. Аның өчен аерым бәхет – аның гаиләсе, хезмәттәшләре, алар аны хәтерли. Ул бик тәртипле кеше иде", - дип сөйләде аның турында район башлыгы Тимур Нагуманов.

«Ул бик күп көч һәм энергия сарыф итте. Халык яшәсен өчен ул барысын да эшләде», - дип билгеләп үтте Ришат Әбүбәкеровның ярдәмчел һәм хезмәт сөючәнлеген ветераннар Советы рәисе Владимир Яшанин.

Олы кызлары Резедә барлык туганнар исеменнән җыелучыларга рәхмәт белдерде: "Без барыбыз да бирегә әти турында, ул нинди кеше булуын искә алу өчен килдек. Мин кешеләрнең аның изге эшләрен хәтерләвенә бик шат. Ул барысын да күрсәтү өчен эшләмәде, ә йөрәге кушканга эшләде. Мин сезнең һәрберегезгә рәхмәтле".

Аннары кунаклар Ришат Әбүбәкеров каберенә чәчәкләр салдылар.

Фото: Әлмәт муниципаль районы башлыгының матбугат хезмәте