Санкт-Петербургны яуладык

Моңарчы Сургут, Ырынбур, Красноярск, Новосибирск, Пермь кебек зур калаларда, ерак төбәкләрдә милли бәйрәмебезне гөрләтеп уздырган, үзен иң яхшыларның берсе итеп таныткан Әлмәт муниципаль районына Татарстан хөкүмәте тарафыннан быел Россиянең икенче башкаласы саналучы Санкт-Петербургта уздыру хөрмәте кебек зур ышаныч күрсәтелде. Һәм Әлмәт муниципаль районы башлыгы Мәҗит Салихов җитәкчелегендәге безнең делегация ышанычны тулысынча аклады, Татарстан данын лаеклы яклады. Санкт-Петербург губернаторы Георгий Полтавченко, Ленинград өлкәсе губернаторы Александр Дрозденко, ТР Премьер-министры урынбасары - ТР сәнәгать һәм сәүдә министры Равил Зарипов, "Бөтендөнья татар конгрессы" башкарма комитеты рәисе урынбасары Нурия Гәрәева Әлмәт делегациясенең Санкт-Петербургта Сабан туен уздыру эшчәнлеген, әлмәтлеләр мәйданы - "Әлмәт авылы"н, сәхнәсен, безнең "йолдызлар"ның чыгышын югары бәяләделәр.

Әлмәтлеләр белән параллель рәвештә бәйрәмне оештырган Башкортстан делегациясе үпкәләмәсен, ләкин журналистларга биргән әңгәмә барышында да Санкт-Петербург губернаторы: "Әлмәтлеләр бар яктан да югары осталык, оешканлык күрсәттеләр. Иң яхшы мәйдан, күргәзмәләр Әлмәтнеке, ягъни Татарстанныкы булды", - дип кистереп әйтте.

"Әлмәтлеләр моңарчы югары осталык үрнәкләре күрсәттеләр. Шуңа күрә дә Санкт-Петербургка җибәрү өчен нәкъ бу муниципаль район сайлап алынды. Булдыра торган калаларга, районнарга гына шундый ышаныч күрсәтелә. Әлмәт бу юлы илебезнең икенче башкаласы халкын һәм җитәкчелеген дә шаккатырды", - диде журналистларга Нурия Гәрәева да.

Санкт-Петербургта татарлар сан буенча икенче урынны алып торалар, биредәге күпсанлы милләттәшләребез ел буе Сабан туен зарыгып көтеп алалар. Зур Ватан саналучы Татарстаннан килгән татарлар белән аралашу, "тере" татар җырчылары, биючеләре, сүз осталары белән якыннан аралашудан зур бәхет юк, диделәр алар безгә. Санкт-Петербург татарлары, яңгыр сибәләп торуга карамастан, бу көнне рәхәтләнеп күңел ачтылар.

Сабан туен ачу тантанасында Санкт-Петербург, Ленинград өлкәсе губернаторлары һәм башка югары кунаклар төп сәхнәдән татарстанлыларга рәхмәт җиткерделәр, бәйрәмнең үзенчәлегенә, дөньяда дан тоткан бу калада, өлкәдә татарларның тоткан урынына тукталдылар. ТР Премьер-министры урынбасары Равил Зарипов һәм Әлмәт муниципаль районы башлыгы Мәҗит Салихов ТР Президенты Рөстәм Миңнехановның котлавын, дәүләт бүләкләрен ирештерделәр, Казан, Әлмәт күчтәнәчләрен тапшырдылар. "Бөтендөнья татар конгрессы" башкарма комитеты рәисе урынбасары Нурия Гәрәева да Санкт-Петербург Сабан туен оештыруда зур өлеш керткәннәргә Конгрессның Рәхмәт хатларын, бүләкләрен тапшырды. Санкт-Петербург татарларына бүләк рәвешендә "Халкым минем" газетасы таратылды.

Данлы кала татарлары әлмәтлеләр төп сәхнәдә чыгыш ясаганда да, махсус үзләре өчен куелган сәхнәдән бәйрәм номерларын бүләк иткәндә дә безнекеләрне аеруча үз итеп, аларга кушылып, җырлап-биеп күңел ачтылар. Әлмәт сәхнәсе, Сургут, Красноярск, Пермьдагы кебек үк, Санкт-Петербургта да иң күп тамашачыны җыйган менбәр булды. Сәхнәдә Зиннур Сафиуллин, Райлә Маннанова кебек үзләре өчен күптән якын булган сәхнә йолдызларын күргәч яшьләрен дә яшерә алмадылар. "Райләне тыңлар өчен бик яшь чагыннан ук Татарстанга - Әлмәт якларына кайткач концертларына бара идем. Инде монда, үзебездә күрермен дип, җырларын тыңлармын дип һич тә уйламаган идем", - ди Санкт-Петербургның бер оешмасында урынбасар булып эшләүче Наил әфәнде. "Рәис Нәгыймов, Роберт Андреев, Зиннур Сафиуллин, Райлә Маннановаларның Әлмәттән икәнен беләм, алар килер әле диеп, аларны күрер өчен килдем Сабан туена", - ди күз яшьләрен кулъяулыгы белән сөртә-сөртә 71 яшьлек Нурия апа.

"Әлмәтлеләргә гашыйк булдым, Татарстанга кайткан кебек булдым. Пенсиядә инде мин хәзер, гел кайтып йөрергә акча яклары кысанрак шул. Рәхмәт Татарстан хөкүмәтенә Сабан туен шулай итеп оештырганы һәм быел Әлмәт артистларын җибәргәне өчен. Шулай ук Әлмәт башлыгына да зур рәхмәт! Үзе килгән бит, матур итеп сөйли татарчасын", - ди Әхмәт исемле Санкт-Петербург эшмәкәре.

"Бөтен татарларны аралаштырып торучы "Бөтендөнья татар конгрессы"на рәхмәтемне белдерәсем килә. Казанга да гел дәшеп торалар", - дип үзе килеп сүз башлады Альберт исемле бер әфәндебезнең кулда "Бөтендөнья татар конгрессы"ның пакетын күргәч.

Санкт-Петербург халкы чүлмәк вату, капчык киеп йөгерү кебек һәм әлмәтлеләр оештырган башка уеннарда да теләп катнашты, җиңүчеләргә милли бәйрәмебез истәлеге - бүләкләр тапшырылды. "Безнең өчен иң кадерле ядкарь бу бүләк", - ди чүлмәкне бик оста ваткан Хәмит.

Афәрин, Әлмәт! Афәрин, Татарстан! Сабан туе барышында бу сүзләр аз яңгырамады. Ә Әлмәт делегациясе кешеләре өчен шуннан да зур бүләк юк иде. Чынлап та, зур ышаныч акланды, бәйрәм бәйрәмчә узды, читтәге, ерактагы татарлар өчен, бик күпләргә бик якын Санкт-Петербург өчен дә Әлмәт каласы иң якын төбәкнең берсенә әверелде.

Г.КӘРИМОВА.

Автор фотолары.