Әлмәт театрында Рәфкать Шаһиевның шәхси тугралар күргәзмәсе тәкъдим ителде

14 мартта Әлмәт татар дәүләт драма театрында тамашачылар хозурына Рәфкать Шаһиевның шәхси тугралар күргәзмәсе тәкъдим ителде.

Күргәзмәгә барлыгы 28 эш куелган. Аларның авторы - язучы, филология фәннәре кандидаты, Р. Төхфәтуллин, С. Сөләйманова исемендәге әдәби премияләр лауреаты, «Әлмәт таңнары» газетасының баш мөхәррире, Татарстан Язучылар берлегенең Әлмәт бүлеген ун ел буена җитәкләгән Рәфкать Шаһиев.

«Җәй көне ниятләгән гамәлебез изге Рамазан аенда тормышка ашты, Аллаһка шөкер. Без бөтен театрыбыз белән бәхетле, чөнки артистларыбызның үзләренең тугралары бар. Тугра - ул элек ханнарда гына булган», - дип билгеләп үтте театр директоры Фәридә Исмәгыйлева.

Рәфкать Шаһиев сүзләренчә, тугралар - ул театрга булган мәхәббәтенең чагылышы.

«Беренчедән, мин актерларның хезмәтен яратам, хөрмәт итәм. Башта Роза Салихованың туграсын ясаган идем, аннары үземә дә кызыклы булып китте һәм алар белән аралашкан, газетада мәкаләләр чыгарган актерларның тугралары эшләнде, алга таба барысын да эшләп чыгармын дип уйлыйм. Холыкларын ничек күрәм, шулай бирергә тырыштым. Бу гарәп язулы тугралар Рамазан аенда, Аллаһының кодрәте белән, безнең артисларга иҗат дәрте өстәсен, сәламәтлек бирсен һәм минем ихластан аларга булган мәхәббәтемнең чагылышы итеп кабул ителсен иде», - диде ул.

Артистлар, рәхмәт йөзеннән, Рәфкать Шаһиевка атынгыч кәнәфи бүләк иттеләр.

Резедә Шәмсуллина