Әлмәттә ТР мөселманнары Диния нәзарәтенең күчмә пленумы узды

Әлмәтнең яңартылган үзәк мәчетендә ТР мөселманнары Диния нәзарәтенең күчмә пленумы булды. Татарстан мөфтие Камил хәзрәт Сәмигуллин рәислегендәге утырыш эшендә аның урынбасарлары, казыйлар, шулай ук бөтен республикадан имам-мөхтәсибләр, гамәлгә куелган структуралар һәм ТР мөселманнары Диния нәзарәте эшчәнлегенең барлык юнәлешләре җитәкчеләре катнашты.

Татарстан республикасы рәисенең эчке сәясәт мәсьәләләре департаментының дини берләшмәләр белән хезмәттәшлек идарәсе башлыгы Альберт Дирзизов, Татарстан республикасы вице-премьеры – Татарстан республикасы икътисад министры Мидхәт Шаһиәхмәтов, Әлмәт районы башлыгы Тимур Нагуманов, «Татнефть» ГАҖ генераль директорының социаль мәсьәләләр буенча урынбасары Рөстәм Мөхәммәдиев пленумның мактаулы кунаклары булдылар.

Рәсми өлеш башланганчы пленумда катнашучылар өчен шәһәр буенча танышу экскурсиясе оештырылды. Кунаклар ТР мөселманнары диния нәзарәтенең "Нур" мәктәбендә, яңартылган җәмигъ мәчете комплексында булдылар. 

Күчмә пленумны Коръән уку белән танылган мөселман галиме, Дубай халыкара Изге Коръән премиясе (DIHQA) Коръән әзерләү комиссиясе башлыгы шәех Маэмун әр-Рави ачып җибәрде.

Әлмәт муниципаль районында 62 милләт вәкиле дус һәм тату яши, 42 мәчет, 18 дини–православие үзәге үз эшчәнлеген алып бара. Үз чыгышында Тимур Нагуманов шулай ук мөселман җәмәгатьчелегенең шәһәр тормышында актив катнашуын билгеләп үтте. Татарстан мөфтие Камил хәзрәт Сәмигуллин Россиядә ислам финанслары базарының торышы турында сөйләде, ТР мөселманнары Диния нәзарәтендә эшләнгән һәм хупланган ислам финанс продуктлары белән таныштырды, шулай ук бу өлкәдә кайбер проблемаларны билгеләде һәм имам-мөхтәсибләр алдына бурычлар куйды. Аннары Татарстан Республикасы вице – премьеры-Татарстан Республикасы икътисад министры Мидхәт Шаһиәхмәтов Татарстан Республикасында партнерлык (ислам) финанслары буенча экспериментны гамәлгә ашыруның барышы турында киңәйтелгән доклад белән чыгыш ясады.

ТР мөселманнары Диния нәзарәтенең галим секретаре, шәригать фәннәре докторы Рөстәм хәзрәт Нургалиев пленумда катнашучыларны эндаумент-фонд системасы һәм ТР мөселманнары диния нәзарәте тарафыннан эшләнгән башка ислам финанс продуктлары белән таныштырды. Шулай ук пленум кысаларында партнерлык (ислам) финанслары күргәзмәсе дә эшләде. Күргәзмәне 9 финанс оешмасы тәкъдим итте, алар үзләренең ислам финанс продуктларын тәкъдир иттеләр һәм тәҗрибәләре белән уртаклаштылар.

Фото: Әлмәт муниципаль районы башлыгы матбугат хезмәте