2023 елда дини бәйрәмнәр һәм мөбарәк көннәр

23 гыйнвар - 1 нче Рәҗәб.

26-27 гыйнвар - Рәгаиб кичәсе. Өч изге айның беренчесе булган Рәҗәб аеның 4-5 нче көннәре. Бу кичәдә Рәсүлулланың атасы хәзрәти Габдуллаһ белән анасы хәзрәти Әминәнең никахлары булып, беренче тапкыр күрешкәннәр. Дини китаплардан күренүенчә, бу - Пәйгамбәребез Мөхәммәд салләллаһу галәйһи вә сәлләмнең туачагы тәгаен билгеле булган кич.

17 сеннән 18 февральгә - Миграҗ кичәсе, Рәҗәб аеның 26-27 нче көне. Бөтен кешелек дөньясына рәхмәт һәм шәфкать итеп җибәрелгән Пәйгамбәребез Мөхәммәд салләллаһу галәйһи вә сәлләмнең җиде кат күккә, Аллаһы Тәгалә хозурына ашуы белән бәйле бәйрәм.

21 февраль - 1 нче Шәгъбән.

6 сыннан 7 мартка - Бәраәт кичәсе, Шәгъбан аеның 14-15 нче көне. Бәраәт кичәсе - ул гөнаһтан, явыз нияттән, золым гамәлдән, адәм вә хайван рәнҗетүдән, җәзадан коткарылу, хәрамнан арыну мәгънәсен аңлата. Шәригатьчә әйткәндә, Бәраәт - ул гафу-мәгъфирәт, истигъфар кичәсе. Бәндәләрнең бер еллык бәхете шушы кичәдә тәгаен кылына. Шуның өчен бу кичә изге кичәләрдән санала.

23 март - изге Рамазан ае һәм Ураза башланган көн.

17 сеннән 18 апрельгә - Кадер кичәсе, Рамазан аеның 26-27 нче көне. Коръән Кәримдә искә алынган иң мөһим, иң әһәмиятле кичә. Бу төн - язмыш хәл ителә торган, көч-кодрәт төне.

21 апрель - Ураза бәйрәме, Шәүвәл аеның 1 нче көне. Мөселманнарның ике зур бәйрәменең берсе. Мөэмин-мөселманнар Рамазан аенда ураза тота, ай дәвамында сәхәргә тора, калебләрен Хак Тәгаләгә юнәлтеп, гафу итүен сорап, Аңа ялвара, тәүбә итә, дога һәм намаз укый.

27 июнь - Гарәфә көне, Зөлхиҗҗә аеның 9 нчы көне. Хаҗ гамәле шушы көндә башкарыла. Изге Гарәфә көнендә Җир шарының төрле кыйтгаларыннан, илләреннән Ислам диненең бишенче баганасы, терәге булган хаҗ гыйбадәтен үтәү өчен олы тырышлык һәм ихласлык белән килгән берничә миллион хаҗилар Гарәфәт тавында дога вә гыйбадәт, тәсбих вә тәһлил, истигъфар вә тәлбия әйтеп, хаҗ гыйбадәтенең икенче фарызын үтиләр.

28 июнь - Корбан бәйрәме, Зөлхиҗҗә аеның 10 нчы көне. Мөселманнарның иң зур бәйрәме. Ураза тәмамлангач, нәкъ 70 көннән соң башлана торган Корбан чалу бәйрәме, ул 3 көн дәвам итә.

27, 28, 29, 30 июнь, 1 июль - Тәкъбир әт-Тәшрикъ көннәре, Зөлхиҗҗә аеның 9, 10, 11, 12, 13 нче көннәре. Гарәфә көнендә (27 июнь) иртәнге намаздан башлап, Зөлхиҗҗә аеның 13 нче көнендәге икенде намазын да (1 июль) кертеп, фарыз намазның һәркайсыннан соң сәлам биргәч, Аллаһы Тәгаләне олылап, Аны данлап, өч мәртәбә: «Аллаһү әкбәр, Аллаһү әкбәр. Ләә иләәһә илләллааһү вәллааһү әкбәр. Аллааһү әкбәр вә лилләәһил-хәмд» дип тәкбир әйтү мәҗбүри була (хатын-кыз тәкбирне эчтән әйтә).

19 июль - яңа 1445 Һиҗри ел башланган көн, Мөхәррәм аеның 1 нче көне. Бу айда күп итеп хәер (зәкят) бирелә, изге гамәлләр кылына.

28 июль - Гашура бәйрәме, Мөхәррәм аеның 10 нчы көне. Мөхәррәм ае мөселманнар өчен иң хөрмәтле айларның берсе булып тора. Гашура исә Мөхәррәм аеның иң кыйммәтле көне санала. Бу көнне ураза тоту һәм хәер өләшү сөннәт. Пәйгамбәребез Мөхәммәд салләллаһу галәйһи вә сәлләм һәм сәхабәләр бу көннәрдә ураза тоткан. Гашура сүзе гарәпчәдән «ун» дип тәрҗемә ителә. Бу көнне күп пәйгамбәрләр бәхетсезлекләрдән, төрле афәтләрдән котылып калган булганнар.

26 сыннан 27 сентябрьгә - Мәүлид кичәсе (Мәүлид Ән-Нәби), Рабигыль-әүвәл аеның 11-12 нче көне. Иң зур бәйрәмнәрнең берсе - Пәйгамбәребез Мөхәммәд салләллаһу галәйһи вә сәлләмнең туган көне.