Россиядә беренче «Чайка-СПГ» газ-мотор теплоходында ТР Президенты Рөстәм Миңнеханов булды

Татарстан Президенты Россиядә сыекландырылган табигый газда эшләү өчен төзелгән беренче пассажир елга судносын карады. Рөстәм Миңнеханов анда Казансу елгасы буйлап йөрде. Бу хакта «Татар-информ» МА ТР Президенты матбугат хезмәте җитәкчесе Лилия Галимова хәбәр итте.

"Бүген ТР Президенты Рөстәм Миңнеханов презентациядән соң Казан буенча „Чайка-СПГ“ газ-мотор теплоходында булды. Рөстәм Миңнехановны сәфәрдә проектны эшләүчеләр озата йөрде", - диде ул. 

Судноны республика җитәкчесе өчен «Ак Барс» судно төзү корпорациясе генераль директоры Ренат Мистахов тәкъдир итте. Ул билгеләп үткәнчә, «Чайка-СПГ» судносы пассажирлар ташуга керешергә әзер.

«Чайка-СПГ» теплоходы Горький исемендәге Яшел Үзән заводында төзелде һәм 2020 елның августында суга төшерелде. Судно 176 кешегә кадәр сыйдыра, аның озынлыгы — 58,8 метр, киңлеге — 10,8 метр. Теплоход шул исәптән Казан эчендә пассажирлар йөртүгә дә хезмәт күрсәтә ала, чөнки түбән күперләр астында уза ала.