Татарстанда "Балалар-балаларга" акциясе башланды

Татарстанда 4нче «Балалар — балаларга» акциясе старт алды, аның инициаторы - Анжела Вавилова, фонд аның исемендә. Бу хакта хәйрия оешмасы матбугат хезмәте хәбәр итә.

Хәйрия чарасында катнашучылар авыручы балаларга ярдәм итә.

«Бу акцияне без инде дүртенче ел уздырабыз. Узган ел анда бөтен Татарстаннан мәктәп укучылары, ата-аналар һәм укытучылар катнашты. Алар безгә Казан хосписы карамагындагы балалар өчен 276 мең сумга якын акча җыярга ярдәм иттеләр", - дип уртаклашты Анжела Вавилова исемендәге фонд идарәсе рәисе Владимир Вавилов.

Акча махсус туклану, дарулар һәм медицина җиһазлары сатып алуга тотылачак. Чараның шигаре түбәндәгечә яңгырый: "Яхшылык бетмәячәк".

Моннан тыш, фонд тарафыннан Казан хосписы карамагындагылар, шулай ук ДРКБ онкогематология бүлегеннән балалар өчен мәктәп кирәк-яраклары алу өчен акча җыю алып барыла.

Бу балалар өчен 1 сентябрьдә мәктәпкә бару зур шатлык булыр иде, әмма диагнозлары аларга бу көнне калган укучылар белән беррәттән бәйрәм итәргә мөмкинлек бирми. Шуңа күрә акцияне оештыручылар аларга үзләрен бу бәйрәмгә катнашы аз гына булса да тоярга ярдәм итәргә тели", - диде Владимир Вавилов.

Мәктәп укучылары өчен бүләкләр алу өчен 100 мең сум тирәсе акча кирәк.