Мең дә бер киңәш
Кышка яшелчәдән ассорти ясыйбыз
Барлык банкалар да тимер капкачлар белән ябыла. Әгәр банкаларны әзерләгәндә тиешле нормалар һәм чисталык сакланса (аларны парда тотып стерильләштерү һәр рецептка да мәҗбүри), бер генә банкагыз да “атмаячак”.
Ингридиентлары:
- карлыган, чия яфрагы
- 10 бөртек кара борыч
- 3-4 канәфер
- 2-3 имән яфрагы
- укропның өлгергән башы
- суган
- кишер
- кәбестә
- кыяр
- помидор
- кабачок
- болгар борычы
- сарымсак
Эш барышы:
- 3 литрлы банканың төбенә карлыган, чия яфрагы, 10 бөртек (горошек) кара борыч, 3-4 канәфер, 2-3 имән яфрагы (булмаса да куркыныч түгел), укропның өлгергән башы салына.
- Аннан соң урталай ярылган суган, кишер, 3-4 кисәккә ярылган уртача кәбестә, кыяр, помидор, эре-эре телемнәргә киселгән кабачок, болгар борычы (аларны төрлечә аралаштырырга була, төп компонент – кәбестә), 4-5 өлеш сарымсак саласың.
- Банка тулгач, кайнап торган су саласың, 10 минут торгач (ул арада икенче банканы тутыра торасың), суын кастрюльгә бушатасың
- 3 аш кашыгы тоз, 4 аш кашыгы шикәр комы салып кабат кайнатып чыгарасың, ул кайнаган арада 3 аш кашыгы уксус салып куярга онытмаска!
- Кайнап чыккан рассолны банкага салып, капкачын ябасың.
Кышын ассортиның, гадәттә, суганы, кишере ашалып бетми, аларны кәбестә ашына салып җибәрәсең. Менә дигән витамин!
Следите за самым важным и интересным в Telegram-каналеТатмедиа