Агулы борщевикка каршы Биектауда шәрә кул көрәшәләр

Җәй ромашкалар һәм якты кояш белән генә түгел, ә балтырган үсемлеге белән дә күз алдына килә. Биектау районы өчен бу җитди проблема. Сосновский балтырганы (борщевик) районның күп кенә авылларында үсә. Бу хакта «Биектау хәбәрләре»ндә язалар.

Татарстан Прокуратурасы агулы үсемлекне юкка чыгаруны таләп итте. Әлдермеш авыл җирлегендә яшәүчеләр агулы чүп үләнен кул белән кояш баеганнан соң юк итәләр. Әлдермеш өчен әлеге куркыныч үсемлек белән проблема гадәти хәл. Аның белән көрәшкә ел саен чыгалар. Үсемлек тиз үсә һәм бетерергә өлгереп булмый.

Әлдермеш авыл җирлеге башлыгы Тәлгать Сабиров: «Барлык өч авылда да бөтен җирдә сулыклар янында, юл янында балтырганга каршы ел саен көрәшәбез".

Тәлгать Сабиров балтырган белән көрәштә химикатларны куллану куркыныч, дип аныклый, һәр трактор да анда керми. Шуңа күрә могҗизалы чара уйлап табылмаган арада, барысын да үз көчең белән һәм җирле халык һәм балалар файдасына эшләргә туры килә, чөнки үсемлек зур куркыныч тудыра. Пациентлар пешүләре белән ел саен Биектау үзәк район хастаханәсенә мөрәҗәгать итәләр.