Әлмәт районы Клементейкино авылында гражданнар җыены узды

23 гыйнварда чираттагы очрашу районның иң ерак торак пунктларының берсендә-Клементейкино авылында узды. Анда район башлыгы Тимур Нагуманов, авыл җирлеге депутатлары, Россия Эчке эшләр министрлыгының Әлмәт районы буенча вәкилләре, прокуратура, хезмәтләр һәм ведомстволар, авыл җирлеге халкы катнашты.

2023 ел нәтиҗәләре буенча хисап белән Клементейки авыл җирлеге башлыгы Леонид Языков чыгыш ясады.  Клементейки авыл җирлеге районда мәйданы буенча иң эреләрнең берсе булып тора һәм территориясе 13 902 га тәшкил итә, аларның күпчелек өлешен дәүләт урман фонды 10 145 га биләп тора.

Биш авылда 500 кеше яши, аларның 411е - чуашлар, 50е - татарлар, 17е - руслар һәм 3е-башка милләтләр. Торак пунктта 8 күп балалы гаилә яши.

Авыл җирлеге бюджетының төп керем өлеше булып салымнар тора, хисап елында үтәлеш 4 142 984,51 сум тәшкил итә. Үзара салым акчалары да 100% ка җыелган.

Авыл җирлегендә барлык социаль әһәмиятле объектлар эшли: Сиренькино урта гомуми белем бирү мәктәбе филиалы, мәктәп музее, балалар бакчасы, авыл мәдәният йорты, 2 ФАП, почта элемтәсе бүлекчәсе, китапханә, «Клементейкино» ҖЧҖ, сәүдә предприятиеләре.

Авыл җирлеге башлыгы ветераннар Советы, Мәдәният йорты һәм авылның башка учреждениеләре эшчәнлеген аерым рәхмәт белән билгеләп үтте.
- Үткәрелгән чаралар һәм ирешелгән нәтиҗәләр - барлык ведомстволарның җайга салынган эш үрнәге. Үсеп килүче буынны патриотик тәрбияләүгә, чуаш халык традицияләрен һәм бәйрәмнәрен саклауга зур игътибар бирелә. Чаралар үткәргәндә халыкның барлык катламнары җәлеп ителә. Мәктәп бинасында туган якны өйрәнү музее булдырылган. Алга таба авыл музеен ачарга теләр идек, фондта 300дән артык экспонат җыелган, - дип билгеләп үтте үз чыгышында башлык һәм керү төркемен ремонтлау кирәклеген ассызыклады.

Хисап чорында авыллар территориясендә электр челтәрен норматив хәлгә китерү буенча зур эш башкарылган. 

Халык белән очрашуда полиция, прокуратура, янгынга каршы хезмәт, ветеринария берләшмәсе һәм «Кәләй урманчылыгы» вәкилләре үз ведомстволарының эшчәнлеге турында хисап белән чыгыш ясады.

Йомгаклау сүзе белән район башлыгы Тимур Нагуманов чыгыш ясады.
- Яңа 2024 ел аномаль салкыннар һәм карлар белән башланды. Авыл Советының нәтиҗәле эшләве, юл һәм нефть оешмалары ярдәме белән без төп юлларны кардан чистарта алдык, авылның нормаль тормыш эшчәнлеген тәэмин итә алдык. Бүгенге көндә кар яву нәтиҗәләрен бетерү - авылларда да, шәһәрдә дә иң кискен мәсьәлә. Бу юнәлештә эш көн саен дәвам итә, - дип ассызыклады район башлыгы. Кыскача ул районның, республиканың социаль-икътисади үсеше һәм Президент ярдәмендә тормышка ашырыла торган милли программалар турында сөйләде.

Тимур Нагуманов авыл халкына, бигрәк тә өлкән буын кешеләренә, гуманитар ярдәм җыюда актив катнашулары өчен рәхмәт белдерде.

Аннары авыл халкын борчыган сораулар яңгырады. Төп-«Казан – Оренбург» – Иске Багряж-Елхово автомобиль юлының Яшьләр урамы буенча Клементейкино авылы аша үтүе, Полянка авылына кәрәзле элемтә булмау һәм стационар элемтәнең начар сыйфаты, Багряжка елгасы аша авария хәлендәге автомобиль күперен ремонтлау. Гражданнарның мөрәҗәгатьләре протоколга кертелде һәм контрольгә алынды. Очрашу авыл җирлегенең актив яшәүчеләрен бүләкләү белән тәмамланды, дип хәбәр итә Әлмәт районы башлыгы матбугат хезмәте.

Фото: Әлмәт районы башлыгы матбугат хезмәте