Әлмәттә бу елның 7 аенда 73 юл-транспорт һәлакәте булган

Комиссия утырышы район башкарма комитеты җитәкчесе вазифаларын башкаручы Андрей Подовалов рәислегендә узды. Утырыш эшендә автотранспорт һәм юл күзәтчелеге, халыкара автомобиль ташуларын контрольдә тоту идарәсенең Кама буе бүлеге башлыгы Анатолий Жаренков, баш дәүләт инспекторы Айдар Миңнеханов, өлкән дәүләт инспекторы Эльвира Хәбибуллина, предприятиеләр, юл хезмәтләре, хокук саклау органнары җитәкчеләре, юл хәрәкәте куркынычсызлыгы комиссиясе әгъзалары, транспорт предприятиеләре вәкилләре катнашты.

Анатолий Жаренков сәламләү сүзендә Әлмәт муниципаль районында халыкка транспорт хезмәте күрсәтүне һәм юл эшчәнлеген бәяләү максатында планлы контроль-күзәтчелек чаралары башлануы турында хәбәр итте.

Әлмәт муниципаль районы территориясендә 2021 елның 7 ае нәтиҗәләре буенча булган юл-транспорт һәлакәтләренә анализ һәм мәктәп автобусларының техник торышын тикшерү турында Россия Эчке эшләр министрлыгының Әлмәт районы буенча ЮХИДИ бүлеге начальнигы урынбасары Андрей Лиманский хәбәр итте. Ул хәбәр иткәнчә, хәзерге вакытта Әлмәт районы территориясендә 73 юл-транспорт һәлакәте булган, аларда 7 кеше һәлак булган һәм 98 кеше яраланган. Аварияләр  саны узган ел дәрәҗәсендә калган: һәлак булучылар саны 5 кешегә кимегән, тән җәрәхәтләре алучлар 9 кешегә арткан. Юл-транспорт һәлакәтләренең төп төрләре-бәрелешләр, җәяүлеләрне бәрдерү, юл читенә төшеп китү.

Уку елы башланыр алдыннан ЮХИДИ бүлеге техник күзәтү хезмәткәрләре мәктәп автобусларының техник торышын тикшерде. Тикшерү барышында балаларны йөртүдә катнашучы шоферлар, «D» категориясе белән эшләү стажы, административ җаваплылыкка тарту, техник карап чыгу вакыты турында мәгълүматлар анализланды.

Федераль һәм төбәк әһәмиятендәге автомобиль юлларында юл хәрәкәте иминлеген тәэмин итүгә юнәлдерелгән чаралар турында «Татнефтедор»  башлыгы Илшат Галимов хәбәр итте. Әлмәт муниципаль районында алар тарафыннан гомуми файдаланудагы 600, 432 км автомобиль юлына хезмәт күрсәтелә: 508,612 км төбәк әһәмиятендәге юлларга; 91,82 км федераль әһәмияттәге юлларга.

«Имин һәм сыйфатлы юллар» республика программасы буенча Әлмәт-Азнакай, Әлмәт-Мөслим автомобиль юлларының ремонт участокларында эшләр тәмамланган, Рус Акташы-Кузайкино автомобиль юлында эшләр дәвам итә.

Шәһәрнең автомобиль юллары идарәсе директоры Илсур Сәлимгәрәев үз чыгышында Әлмәт шәһәренең урам-юл челтәрендә юл хәрәкәте иминлеген тәэмин итүгә юнәлдерелгән чаралар турында сөйләде.

Агымдагы елның 7 аенда әлеге оешма көче белән җитми торган юл билгеләре куелган, шәһәр юлларында 180,7 км көзге тамга яңартылган, 460 җәяүлеләр кичү юлында зебра тамгасы төшерелгән. Җәяүлеләрнең куркынычсызлыгы өчен җәмәгать транспортының тукталыш кесәләрендә, юллар белән кисешкән вакытта велоюлларда тамгалар төшерелгән. Юл хәрәкәте иминлеген тәэмин итү өчен 12 667 кв.м мәйданда чокырларны ямау эшләре башкарылган. Велосипед юллары төзү һәм шәһәр урамнарында тротуарларны ремонтлау дәвам итә, шуның аркасында велосипедчылар хәрәкәте чикләнә, бу исә юл хәрәкәте иминлеген арттыра.

«Татнефть» компаниясенең финанс ярдәме белән Базовая, Белоглазов, Геофизик, Интернациональ, Завод, Ломоносов урамнарында, юл зонасында ремонт эшләре алып барыла, анда шулай ук өстәмә билгеләр кую, юл тамгаларын төшерү, светофор объектларын модернизацияләү, тукталыш павильоннарын урнаштыру һәм яктырту урнаштыру планлаштырылган», - дип хәбәр итте ул.

Комиссия утырышын тәмамлап, Андрей Подовалов шәһәрнең барлык хезмәтләрен юл хәрәкәте иминлеген тәэмин итү мәсьәләләрендә нәтиҗәле хезмәттәшлек итәргә, халыкның үзаңын һәм юл хәрәкәте кагыйдәләрен белүдә грамоталылыгын арттыру буенча актив эш алып барырга чакырды.

Фото: Әлмәт районы башлыгы матбугат хезмәте