Элвин Грейның бәйгесендә катнашырга теләүчеләр күп булган

«Яңа моң» Халыкара бәйгесенә гаризалар кабул итү төгәлләнгән. Бәйгегә 7 илдән барлыгы 800 гариза килгән. Алар арасыннан 50 иң яхшы кандидатны сайлап алып, Уфага чакырачаклар, дип яза «Башинформ» агентлыгы проектның җитәкчесе Элвин Грейга (Радик Юльякшин) сылтама белән. Бу хакта "Татар Информ" хәбәр итә. 

Супер-финалистны 1 миллион сум күләмендә төп бүләк көтә.

Бәйге Башкортстан башкаласында март аеннан майга кадәр дәвам итәчәк. Барлыгы 16 телепрограмма әзерләнәчәк, аларны төбәк һәм федераль каналларда трансляцияләү күздә тотыла.

Бәйгедә рус, башкорт һәм инглиз телләрендәге җыр белән 18-35 яшьлек башкаручылар катнаша ала. Шоуда Россия, милли һәм чит ил эстрадасы җырчылары, башкаручылары һәм композиторлары була. Катнашучылар белән Россиянең иң яхшы белгечләре эшләячәк, дип вәгъдә итә оештыручылар.