Әлмәттә үзәк мәчет ачылачак

Риза Фәхретдин исемендәге үзәк мәчет шактый яңартылган. Якты кызыл, яшел һәм алтын төсләр акка үзгәртелгән. Моннан тыш, бинаның архитектурасына ерактан күренеп торган манаралар өстәлгән.

Озакка сузылган реконструкция вакытында Мәрҗани урамындагы юл ябылган. Хәзер исә осталарның эше тәмамланган.

Элегрәк хәбәр ителгәнчә, мәчетне ремонтлауны нәкъ менә Корбан бәйрәменә тәмамларга планлаштыралар һәм Татарстан Рәисенең истәлекле датага килүен көтәләр.

Әлмәт халкы арасында мәчетнең үзгәрүе шактый бәхәсләр тудырды. Кемдер заманча архитектурага сокланып хупласа, мәчетне ремонтка хәтле булган стильдә  калдырырга  кирәк иде диючеләр булды. Ә сез нинди фикердә?