Рухы патриот, йөрәге батыр

Чираттагы герой - Артем Ванюков хәрби бәрелешләр зонасына иң беренчеләрдән булып киткән якташыбыз.

Махсус хәрби операция башланганчы өч ел элек үк ул Оборона министрлыгы белән контракт төзегән булган инде.

- Минем бәләкәйдән үк хәрби буласым килде. Армия сафларына алынганда ук мин үземнең тормыш юлымны хәрби хезмәт белән бәйләячәкмен дип карар кылган идем. Көчле рухлы, физик яктан ныклы һәм җитез буласы килүем физкультура көллиятенә алып килде. Көллияттә белем алган чорда ук патриотик юнәлеш белән мавыктым, төрле чараларда, ярышларда катнашып, призлы урыннар яулап килдем. Кечкенәдән үк спортны яратуым махсус хәрби операция зонасында бик нык ярдәм итте. Хәрби заданиеләрне үтәгәндә җитез, өлгер һәм шул ук вакытта сабыр, түзем, дисциплиналы булырга кирәк иде, - дип искә ала Артем.

Артем Ванюков Киев өлкәсенә кадәр барып җитүчеләр арасында булган каһарманнарның берсе. Аның медальләре байтак.

- Беренче бүләкләнүем 2023 елда булды.  Безнең төп бурыч колоннаны Киев өлкәсенә кадәр алып барып җиткерү иде. Әлеге бурычны без җиренә җиткереп, лаеклы итеп үтәдек . «Сугышчан батырлык өчен» медалем шуннан, - ди Артем.

Моннан тыш батыр егетнең күкрәгендә спецназдагы хезмәте өчен бүләге дә бар. Бүгенге көндә ул инде махсус хәрби операция  ветераны буларак яшьләр арасында патриотик тәрбия эшен алып баруын дәвам итә.

- Хәзер мин юнармиядә эшлим. Яшьләргә Ватанга тугрылыклы хезмәт итүнең нәрсә икәнен үз мисалымда аңлатырга, төшендерергә тырышам, - дип ассызыклады Артем Ванюков. МХО героена сәламәтлек һәм игелекле хезмәтендә уңышлар теләп калабыз.

Резеда Исмәгыйлева әзерләде