Әлмәт ишегалларында текбол уйнау өчен өстәлләр барлыкка киләчәк

Әлмәт ишегалларында текбол уйнау өчен өстәлләр барлыкка киләчәк

Әлмәттә «Безнең ишегалды» йорт яны территорияләрен төзекләндерү программасы үсүен дәвам итә, анда яшәүчеләргә актив ял итүнең яңа форматларын тәкъдим итәләр. 2026 елның төзелеш сезонында шәһәрнең яңартылган ишегалларында заманча спорт җиһазлары – текбол уйнау өчен өстәлләр урнаштыру планлаштырыла.

Текбол-футбол һәм өстәл теннисы гибриды. Уен махсус бөгелгән өстәлдә уза, ә ракеткалар урынына футбол тубы кулланыла. Кагыйдәләр буенча катнашучылар тупны тәннең теләсә кайсы өлеше белән (куллардан тыш) кире кайтара алалар.

Район хакимиятендә ачыклык кертүләренчә, бу спорт төре профессиональ футболчылар һәм актив яшәү рәвешен яратучылар арасында киң таралган инде, ә хәзер Әлмәт халкы өчен дә ачык булачак.

2026 елда «Безнең ишегалды» программасы кысаларында комплекслы төзекләндерү эшләре Әлмәт районының 24 ишегалды территориясен колачлый. Хәзерге вакытта техник шартлар текбол өчен җиһазлар урнаштырырга мөмкинлек бирә торган конкрет ишегаллары исемлеге формалаштырыла һәм килештерелә.

Яңа спорт элементларыннан тыш, барлык 24 ишегалдында да стандарт комплекслы эшләр башкарылачак. Ул территорияләрне асфальтлауны, яктыртуны, балалар һәм спорт мәйданчыкларын урнаштыруны, контейнер мәйданчыкларын төзекләндерүне, шулай ук кече архитектура формаларын монтажлауны үз эченә ала.