Яшь әлмәтлеләргә паспортлар тапшырдылар

Бүген Үзәк балалар китапханәсендә беренчеләрдән булып «Без – Россия гражданнары!» Россия Федерациясе гражданины паспортларын яңа форматта тапшыру тантанасы булды. Төп документны 15 яшь кешегә район башлыгы үзе тапшырды.

Тимур Нагуманов ассызыклаганча, паспорт алу белән үсмерләр илнең тулы хокуклы гражданнарына әверелә, хәзер аларга зур җаваплылык йөкләнә.

«Бүген сез олы тормышка беренче адым ясыйсыз. Паспорт-Россия Федерациясе гражданинының беренче мөһим документы. Шул вакыттан башлап сез ата-аналар җавап бирә торган балалар гына түгел, ә илебезнең тулы хокуклы гражданнары. Бу  – бик җаваплы адым. Мин сезне тагын бер кат бу мөһим вакыйга белән котлыйм», - дип мөрәҗәгать итте район башлыгы яшь әлмәтлеләргә.

Мондый тантаналы паспорт тапшыру  ай саен уздырылачак. Бу һәр балага гражданның төп документын алуның әһәмиятен тоярга мөмкинлек бирәчәк, дип хәбәр итә Әлмәт районы башлыгы матбугат хезмәте.