Аспирин битне чистарта
Һәр хатын-кыз чиста бит тиресе турында хыяллана. Тирене дөрес тәрбияләргә кирәклеген һәркем белә. Даруханәләрдә сатылучы гап-гади аспирин да могҗизалар тудырырга сәләтле.
Аспирин – косметика чарасы. Аспирин катнашындагы маскалар тән тиресен чистартырга, аны сафландырырга ярдәм итәр. Аспирин ялкынсынуларны кисәтә, дәвалау үзлекләренә ия. Май бүленү процессын җайлый, тәнне чистарта.
Маска өчен тышчасы булмаган гап-гади аспирин кирәк булачак. Әмма эшкә керешер алдыннан шунысына игътибар итегез: аспирин кайберәүләрдә аллергия китереп чыгарырга мөмкин, ә йөкле һәм имезүче хатын-кызларга андый маскалар тыелган. Шулай ук биттә җәрәхәтләр булганда да кулланырга ярамый.
Катнаш яки майлы тирене чистарту өчен 4 аспирин төймәсе алып, вакларга, шуңа 1 чәй кашыгы үсемлек мае, җылытылган бал һәм 1 аш кашыгы су салына. Масканы биткә сөртеп, җиңелчә массажларга кирәк. 10 минуттан җылымса су белән юып алыгыз.
Бит тиресен агарту өчен вакланган 4 аспирин төймәсенә 1 аш кашыгы лимон согы кушарга кирәк. 10 минут тотарга ярый. Аны 1 литр суга 1 аш кашыгы сода кушып юып төшерергә кирәк.
Нормаль бит тиресе өчен түбәндәге масканы ясагыз: 2 төймәне изәргә, шуңа 2 аш кашыгы кефир яки йогурт кушарга. Масканы 20-30 минут тотарга кирәк.
Следите за самым важным и интересным в Telegram-каналеТатмедиа