Ураза бәйрәме Әлмәт шәһәр паркында узачак

21 апрельдә Әлмәт шәһәр паркында изге Рамазан ае  тәмамлануга багышланган бәйрәм программасы узачак. Ул  13.30 сәгатьтә башлана.

Чара программасында Коръән аятьләрен уку, балалар өчен аниматорлар белән уеннар, өлкәннәр өчен спорт уеннары, сабын куыклары шоулары һәм башкалар планлаштырылган.

Шулай ук һәркемне сыйлар көтә: пылау, коймак, туңдырма, шикәр мамыгы, попкорн.

Әлмәтнең барлык мәчетләрендә бәйрәм вәгазе 7.00 сәгатьтә башланачак. Бәйрәм намазы 7.30 сәгатьтә башлана.

Әлмәт районының барлык авылларында бәйрәм вәгазе 6.00 сәгатьтә, бәйрәм намазы 6.30 сәгатьтә башлана.