Тимур Нагуманов: авария эшләре аркасында 40 нчы балалар бакчасы һәм 14 йорт җылысыз кала

Әлмәттә әлегә 40 нчы балалар бакчасы һәм 14 күп фатирлы йорт җылысыз кала. Мондый хәл мәктәпкәчә учреждение территориясендә торбаның шартлавы һәм авария эшләре аркасында килеп чыккан, дип хәбәр итте туры эфир вакытында Әлмәт районы башлыгы Тимур Нагуманов.

- Бүгенге көндә 40нчы балалар бакчасыннан башка барлык социаль объектларга җылылык җибәрелде. Анда территориядә торба өзелде, хәзер без аны ачтык. Тагын берничә көн кирәк булыр дип уйлыйм. Барысын да төзекләндерәбез, ремонтлыйбыз һәм 40 нчы бакча тулысынча җылылык белән тәэмин ителәчәк. Бүгенге көндә 844 күп фатирлы йортта җылылык җибәрелгән. 14 авария эшләре бара, аларны да кыска вакыт эчендә тәмамларга планлаштырабыз. Бүген шәһәрдә төп җылылык тәэмин итүче һәм барлык бригадалар урыннарда эшлиләр, төгәлсезлекләрне бетерәләр. Быел алар бик күп түгел, шуңа күрә якын арада аларны бетерәчәкбез, - дип вәгъдә итте район башлыгы.

- Хөрмәтле әлмәтлеләр, әгәр сезнең конкрет фатирыгызда, конкрет стоякта әлегә җылылык булмаса, беренче чиратта үз идарәче компаниягезгә мөрәҗәгать итүегезне сорыйбыз. Идарәче компания эшчеләре бүген дә җылылык җибәрү өчен эшлиләр, фатирларда, йортларда йөриләр. Алар сезгә гариза биргәннән соң килерләр. Шул ук вакытта, идарәче компаниягә мөрәҗәгать итү ярдәм итмәсә, кире элемтә минем Телеграм-каналга, чатка мөрәҗәгать итегез, «ВКонтакте»да языгыз. Без гел күзәтәбез. Адресыгызны, фатир номерыгызны  кирәк булганда сезнең белән элемтәгә керергә, язарга мөмкинлек булсын өчен күрсәтегез, - дип мөрәҗәгать итте Нагуманов.

Ул шулай ук Әлмәттә һава торышын җайга салу пунктлары урнаштырылган берничә йорт барлыгын искәртте. Бу система конкрет объектларга җылылык бирү күләмен автоматик рәвештә көйли. Бу кешеләргә хезмәт хакын экономияләргә мөмкинлек бирә. Тимур Нагуманов искәрткәнчә, бу системаның үзенчәлеге бар-тәүлекнең якты вакытында көз ахырында яки яз башында, урамда температура сигез градустан артык булганда, бу пунктлар җылылык бирүдән туктый, батареялар салкын була.

- Җылылык җибәрү-шактый катлаулы эш. Ләкин хәзерге вакытта без аны зур эксцессларсыз узабыз. Якын арада магистральләрдә зур үзгәрешләр булмас дип өметләнәбез һәм бу безгә тиз арада барлык проблемаларны чишәргә мөмкинлек бирәчәк. Һәм инде гадәти эксплуатация режимына күчәрбез. Ләкин без аңлыйбыз, киләсе атнада кабат җылыну булачак (мөгаен), синоптиклар фаразына караганда. Фатирларда нигә эссе булуы турында сездән күп сораулар килергә мөмкин. Ләкин әлегә без  җылылык җибәрү белән шөгыльләнәбез, - дип йомгаклады Нагуманов.