Җәмигъ мәчетенең нигезенә беренче ташның кайчан салыначагы билгеле булды
Татарстан Премьер-министры урынбасары Васил Шәйхразыев Җәмигъ мәчетенең нигезенә беренче таш 20 майда салыначагын хәбәр итте.
«20 майда «Кырлай» паркы территориясендә Җәмигъ мәчетенең нигезенә таш салу булачак. Тулы әзерлек бара. Ул 13.00 сәгатькә планлаштырылган. Нинди генә һава торышы булса да, чара узачак», - диде Васил Шәйхразыев ТР Хөкүмәт йортында узган брифингта.
Васил Шәйхразыев сүзләренчә, мәчеттә 10 мең кеше берьюлы намаз укый алачак. Бинаның макетын эшләүгә бәйге игълан ителгән. Макет сайланганнан соң проект эшләре башланып китәчәк.
«Җәмигъ мәчетенә исем бирү турында фикер алышулар барганын күзәтәбез. Төрле тәкъдимнәр яңгырый. Без аларга игътибар итәбез. Бу эштә халыкның актив катнашуы бик мөһим», - диде Васил Шәйхразыев.
Следите за самым важным и интересным в Telegram-каналеТатмедиа
Оставляйте реакции
