Әлмәттә ишегалларын яңартырга җыеналар

Бөтен республика буенча 1200 ишегалды территориясе яңартылачак.

Быел «Безнең ишегалды» Президент программасы буенча Әлмәт районында 77 ишегалды төзекләндереләчәк. Бөтен Татарстан буенча 1200 ишегалды территориясе яңартылачак. Бу хакта ТР иҗтимагый киңлекләрен үстерү программасы матбугат хезмәте хәбәр итә.

Узган елның язында ТР Дәүләт хезмәтләре сайтында тавыш бирү узды, анда республиканың 92 мең кешесе катнашты. Алар төзекләндерү өчен өстенлекле 200 ишегалдын билгеләделәр.

Исемлекне, беренче чиратта, комплекслылык принцибын исәпкә алып, район администрацияләре тулыландырды.

Апрель аенда ишегалларында төзекләндерүнең йомгаклау схемалары барлыкка киләчәк. Алар халыкка барлык эш этаплары турында җентекле аңлатмалар белән бергә күрсәтеләчәк.

Әтнә, Әлки, Кайбыч, Яңа Чишмә һәм Теләче районнарында программа буенча ишегалларын төзекләндерү эшләре тулы күләмдә тормышка ашырылган инде.

2022 елга программаның бюджеты тугыз млрд. сум тәшкил итә. Акча ТР Президенты тарафыннан бюджеттан тыш чыганаклардан җибәрелә.

Программа буенча алты төр эш башкарылачак:

- юлларны һәм тротуарларны төзү яки ремонтлау;

- эскәмияләр һәм урналар урнаштыру;

– яктырту баганаларын урнаштыру яки гамәлдәге ремонт ;

- ком катламында куркынычсыз балалар һәм спорт җиһазлары урнаштыру;

– каты көнкүреш калдыклары өчен мәйданчык булдыру яки яңарту;

– хуҗалык-көнкүреш җиһазлары урнаштыру.