Әлмәттә БДИ нәтиҗәләре буенча 15 укучы йөз балл җыйган

Агымдагы елда Әлмәттә 15 чыгарылыш сыйныф укучысы БДИ нәтиҗәләре буенча 100 балл җыйды, соңгы алты елда бу иң яхшы нәтиҗә, дип билгеләп үтте Әлмәт районы башлыгы Тимур Нагуманов телеграмма-каналда туры эфир вакытында.

Быел рус теленнән иң күп балл җыйган укучылар саны-6 кеше. Рус әдәбияты, җәмгыять белеме, инглиз теле һәм мәгълүмати-коммуникацион технологияләрдән икешәр кеше, берсе физика буенча иң яхшы нәтиҗәгә ирешкән.

Шәһәрдә һәм районда барлыгы 953 чыгарылыш сыйныф укучысы бердәм дәүләт имтиханын тапшырган. Шуларның 109ы "Укудагы аерым уңышлары өчен" РФ медале белән бүләкләнде.