Рөстәм Миңнеханов: 9 Май – рухи батырлык һәм мәңгелек дан символы

Бүген Казанда Муса Җәлил исемендәге Татар дәүләт опера һәм балет театры мәйданчыгында Бөек Ватан сугышындагы Җиңүнең 81 еллыгына багышланган рәсми чара узды. Тантана Россия һәм Татарстан дәүләт флагларын, Җиңү Байрагын чыгару һәм гимннар яңгырату белән башланып китте.

Республика җитәкчесе Рөстәм Миңнеханов чыгышында җыелганнарны — сугыш ветераннарын, тыл хезмәтчәннәрен һәм хәрбиләрне бәйрәм белән котлады. «9 Май — безнең һәммәбез өчен дә изге, кадерле көн. Ул — батырлык, горурлык һәм онытылмас дан бәйрәме», — дип ассызыклады ул.

Президент халкыбызның сугыш елларындагы ныклы рухын һәм бердәмлеген югары бәяләде. Җиңү бөтен ил көче белән яуланган, һәм бу юлда Татарстаннан фронтка киткән 700 мең кешенең яртысы өйләренә әйләнеп кайта алмаган. «Бәрелеш мәйданнарындагы кыюлык, тылдагы фидакарь хезмәт — җиңүче буынның батырлыгы мәңге йөрәкләребездә сакланачак», — диде Рөстәм Миңнеханов һәм һәлак булганнарны бер минутлык тынлык белән искә алды.

Шулай ук республика Рәисе эвакуацияләнгән завод-фабрикаларның сугыш елларындагы мөһим ролен билгеләп узды: тыл хезмәтчәннәре фронтны һәм илне азык-төлек, кирәкле ресурслар белән тәэмин иткән, ә табиблар яралыларны тернәкләндереп, сафка бастырган.