Яр Чаллыда шәһәрнең 400 еллыгына багышланган «Гаилә традицияләре» муралы ачылды

Яр Чаллыда Идел буе федераль округының «ФормАРТ» урам сәнгате фестивале кысаларында яңа арт-объект тантаналы рәвештә ачылды. Шәһәрнең 400 еллык юбилее уңаеннан булдырылган мурал Шамил Усманов урамындагы 87а номерлы йортның фасадын бизәде. Бу хакта ТР Яшьләр эшләре министрлыгының матбугат хезмәте хәбәр итә.

Ачу тантанасында ТР Яшьләр эшләре министры Азат Кадыйров һәм Яр Чаллы мэры Наил Мәһдиев катнашты. Алар муралга «ФормАРТ» фестивале логотипларын төшергәннән соң, әсәр рәсми рәвештә ачылды.

Муралның авторы — рәссам Александр Попов. Аның «Гаилә традицияләре» исемле эскизы конкурсның төбәк этабында катнашкан 96 эш арасында иң яхшысы дип табылды. Полотнода татар милли ризыгы — өчпочмак әзерләүче әби белән онык сурәтләнгән. Композиция буыннар арасындагы бәйләнешне, гаилә кыйммәтләренә хөрмәтне һәм традицияләрне саклауны гәүдәләндерә.

«Эш бик профессиональ һәм сыйфатлы башкарылган. Төсләр уңышлы сайланган, ә картина үзе күңел җылысы белән сугарылган. Балачак шунда ук искә төшә: без дә әби белән ит турадык, пилмән ясадык, өчпочмак пешердек. Ышанам, бу мурал тирә-яктагы йортларда яшәүчеләрнең күңеленә хуш килде, ә хәзер ул барлык чаллылыларны һәм шәһәр кунакларын җәлеп итә торган яңа ноктага әвереләчәк», — дип билгеләде Азат Кадыйров.

Тантанада рәссамның әбисе Светлана Аркадьевна да катнашты. Яр Чаллы мэры аңа талантлы оныгын тәрбияләгәне өчен рәхмәт сүзләрен җиткерде.

Александр Поповның эше «ФормАРТ» фестиваленең округ этабында Татарстан исеменнән тәкъдим ителә. Җиңүчеләрне «Госуслуги» порталында уздырыла торган халык тавыш бирүе ачыкlayачак. «Гаилә традицияләре» муралы өчен 16 августка кадәр, 4 нче номерлы эшне сайлап, тавыш бирергә мөмкин.

«ФормАРТ» урам сәнгате фестивале 2020 елдан РФ Президентының Идел буе федераль округындагы Тулы вәкаләтле вәкиле Игорь Комаров патронаты астында үткәрелә. Проект «Яшьләр һәм балалар» милли проекты кысаларында яшь рәссамнарга ярдәм итүгә һәм заманча шәһәр мохитен үстерүгә юнәлдерелгән. VII сезон җиңүчеләре август аенда Киров шәһәрендә игълан ителәчәк. Иң яхшы эшләр авторларына 100 меңнән 200 мең сумга кадәр грант тапшырылачак.